मुंबई (प्रतिनिधी हितेश मिस्त्री) – लोकमान्य टिळक वैद्यकीय महाविद्यालयात पदव्युत्तर शिक्षणासाठी प्रवेश देण्यासाठी पैसे घेऊन फसवणूक करणारा उपअधिष्ठाता राकेश वर्माच्या विरोधात आणखी एक गुन्हा दाखल करण्यात आला आहे. वर्मा याच्याविरोधात याआधीही तीन-चार तक्रारी आल्या असून, त्याच्याशी संबंधित दोन मध्यस्थांना अटक करण्यात आली आहे. कोईम्बतूर येथील विद्यार्थिनीची १७ लाखांची फसवणूक केल्याप्रकरणी हा गुन्हा दाखल करण्यात आला आहे.
मध्यप्रदेशची असलेल्या तरुणीची ५० लाखांची फसवणूक केल्याप्रकरणी डिसेंबरमध्ये गुन्हा दाखल करून सायन पोलिसांनी उपअधिष्ठाता राकेश वर्मा याला अटक केली होती. चौकशीदरम्यान वर्मा याच्याविरोधात ३७ लाख, ४४ लाख आणि २६ लाख रुपयांची फसवणूक केल्याच्या तक्रारी पुढे आल्या होत्या. याबाबत तपास सुरू असतानाच आता आणखी एक विद्यार्थिनी तक्रार करण्यासाठी पुढे आली आहे. वर्माबाबतच्या बातम्या वृत्तपत्रांमधून वाचल्यानंतर आपलीही फसवणूक झाल्याचे लक्षात आल्याने या विद्यार्थिनीने सायन पोलिस ठाण्यात तक्रार केली.
स्त्रीरोगतज्ज्ञ होऊ इच्छिणाऱ्या या विद्यार्थिनीला तीन मेडीकल कॉलेजमध्ये प्रवेश मिळूनही लॉकडाउनमुळे प्रवेश घेण्यासाठी जाता आले नाही. याचदरम्यान तिच्या मोबाइलवर एक संदेश आला. यामध्ये महाराष्ट्र, तामिळनाडूमधील कॉलेजमध्ये शेवटच्या काही जागा शिल्लक आहेत, असे नमूद करण्यात आले होते. या विद्यार्थिनीच्या वडिलांनी त्या क्रमांकावर संपर्क केला. तेव्हा अरुण नावाच्या व्यक्तीने त्यांना प्रवेशासाठी मुंबईला बोलावले. त्यानुसार ऑगस्ट २०२० मध्ये मुंबईत आल्यावर अरुण आणि राजेश गुहा नावाच्या व्यक्तींनी त्यांना सायन रुग्णालयात नेऊन राकेश वर्मा यांची भेट करून दिली. ५५ लाख रुपये दिल्यानंतर प्रवेश मिळेल असे त्यांना सांगण्यात आले. एवढी मोठी रक्कम तीन वर्षांत देतो असे वडिलांनी सांगितले. त्यानुसार काही चेक आणि काही रोख अशी सुमारे १६ लाख ६२ हजार इतकी रक्कम देण्यात आली. त्यानंतर वर्मा यांच्या अटकेच्या बातम्या समजताच मुलीच्या वडिलांनी मुंबईत येऊन पोलिसांत तक्रार केली.
