ठाणे (उपसंपादक सतीश बनसोडे) – नुकतीच प्रसूती झालेल्या महिलेला करोनाची लागण झाल्याचे निदान झाल्याने तिला महापालिकेच्या कल्याण पश्चिम येथील आर्ट गॅलरीमधील करोनारुग्णालयात उपचारासाठी दाखल करण्यात आले आहे.
उपचार सुरू असताना सोमवारी संध्याकाळी रुग्णालयातील वॉर्डबॉय श्रीकांत मोहिते याने तिच्याशी अश्लील चाळे करण्याचा प्रयत्न करत तिचा विनयभंग केला. रुग्णालयात नातेवाईकांना येण्यास बंदी असल्याने या महिलेने तातडीने फोनवरून पतीशी संपर्क साधत घडलेला प्रकार सांगितला. यानंतर सदर महिलेच्या पतीने बाजारपेठ पोलिस ठाण्यात धाव घेत सदर वॉर्डबॉयविरोधात गुन्हा दाखल केला असून पोलिसांनी आरोपीला अटक केली आहे.
दोन दिवसांपूर्वी प्रसूती झालेल्या या महिलेला करोना उपचारासाठी आर्ट गॅलरीमधील रुग्णालयात दाखल करण्यात आले होते. रविवारी संध्याकाळी घडलेल्या या घटनेमुळे करोना रुग्णलयातील महिला रुग्णांच्या सुरक्षेचा प्रश्न ऐरणीवर आला आहे.
