पुणे (प्रतिनिधी सुनिल भोसले) – शहरात बेकायदा पार्किंग केलेल्या दुचाकी आणि चारचाकी वाहनांवर कारवाई करून पोलिसांकडून जॅमर लावले जाते. पण अनेकदा वाहनांचे मालक, चालक हे जॅमर काढून दंड न भरता वाहने घेऊन जात असल्याच्या अनेक घटना घडलेल्या आहेत. पण यावेळी मात्र, पोलिसांनी जॅमर लावलेली खासगी बसच चोरीला गेल्याची धक्कादायक घटना वानवडीतील शिंदे छत्री परिसरात घडली. बस चोरी केल्याप्रकरणी वानवडी पोलिसांनी अज्ञातांविरोधात गुन्हा दाखल केला आहे.
खासगी पार्किंगच्या जागेत बस उभी केल्याने वानवडी पोलिसांनी मालक आणि चालकाविरोधात गुन्हा दाखल केला होता. ही बस पोलीस ठाण्यात नेण्याची व्यवस्था करण्यात पोलीस व्यग्र होते. बस नादुरुस्त असल्याने ती घेऊन जाणे शक्य झाले नाही. पोलिसांनी मॅकॅनिकला बोलावलं, पण सुरू झाली नाही. पोलिसांनी शेवटी जॅमर लावून बस लॉक केली. पोलिसांनी दिलेल्या माहितीनुसार, २६ फेब्रुवारीला जॅमर लावलेली बस चोरीला गेल्याची घटना उघडकीस आली. या प्रकरणी पोलीस कॉन्स्टेबल महेश जोंधडे यांनी पोलीस ठाण्यात तक्रार दाखल केली.
पोलीस ठाण्यात नादुरुस्त झालेली बस आणण्यासाठी क्रेन उपलब्ध झाली नाही. त्यामुळे बसला जॅमर लावून लॉक करण्यात आली. दोन पोलीस कॉन्स्टेबल तिथे तैनात ठेवले. बसचे कुणीही नुकसान करू नये म्हणून ती व्यवस्था केली होती. त्याचवेळी पोलीस बंदोबस्तासाठी गेले. २६ फेब्रुवारीला तेथून बस चोरीला गेल्याचे उघडकीस आले. या प्रकरणी पोलिसांनी अनोळखी चोरट्यांविरोधात गुन्हा दाखल केला आहे.
