मुंबई (प्रतिनिधी हितेश मिस्त्री) – काँग्रेसचे प्रवक्ते राजू वाघमारे यांचा भाऊ सुनील वाघमारे यास बलात्काराच्या गुन्ह्याखाली अटक करण्यात आलेली आहे. मुंबई महानगरपालिकेत स्वीकृत नगरसेवक राहिलेल्या सुनील वाघमारे याला एका महिलेवर बलात्कार, फसवणूक, व धमकावण्याचा आरोपाखाली अटक करण्यात आलेली आहे. मुंबईतील भोईवाडा पोलीस ठाण्यांमध्ये यासंदर्भात गुन्हा दाखल करण्यात आलेला होता व तो तपासासाठी लोणावळा पोलीस स्टेशनमध्ये वर्ग करण्यात आलेला होता. त्यानुसार सुनील वाघमारे यास अटक करण्यात आलेली आहे.
सदरच्या महिलेने केलेल्या तक्रारीनुसार, राजू वाघमारे यांचा भाऊ सुनील वाघमारे याने पीडित महिलेला लग्नाचे आमिष देऊन तिच्यावर वारंवार बलात्कार केला. यानंतर पीडितेने लग्नाबद्दल विचारले असता, सुनील वाघमारेने पीडित महिलेला धमकी दिली देऊन तिच्यावर दबाव टाकण्याचा प्रयत्न केला, असा आरोप पीडितेने केला आहे.
सुनीत वाघमारे यांच्या अटकेची काँग्रेसने दखल घेत त्यांच्या अटकेनंतर काँग्रेसने त्यावर स्पष्टीकरण दिलं आहे. सुनीत यांच्याशी काँग्रेसचा कोणताही संबंध नसल्याचं काँग्रेसने स्पष्ट केलं आहे. याबाबत काँग्रेचे नेते सचिन सावंत यांनी ट्विट केलं आहे.
