पुणे (प्रतिनिधी सुनिल भोसले) – तरुणीला प्रेमाच्या जाळ्यात अडकवून, लग्नाचे अमिष दाखवून तिच्यावर विविध ठिकाणी लैंगिक अत्याचार करणारा तरुण विवाह नोंदणीच्या बहाण्याने पळून गेल्याचा प्रकार घडला. तरुणीकडील कागदपत्रे घेऊन या तरुणाने पलायन केले. या प्रकरणी बलात्कार, फसवणूक आणि धमकावल्याच्या आरोपावरून चौघांवर खडक पोलिस ठाण्यात गुन्हा दाखल करण्यात आला आहे.
याबबात गोव्यातील एका २८ वर्षीय तरुणीने तक्रार दिली. त्यानुसार तेजस सुरेश शेलार (वय ३३, रा. रासाई बंगला, एरंडवणे), अमित यशवंतराव पापळ (वय ३५), अभिषेक यशवंतराव पापळ (वय ३३, दोघेही रा. पुणे) आणि त्यांच्या एका ३५ वर्षीय मित्रावर गुन्हा दाखल करण्यात आला. पोलिसांनी दिलेल्या माहितीनुसार, आरोपी शेलार आणि तरुणीची एका मित्राच्या माध्यमातून ओळख झाली. तरुणी पुण्यात नोकरीसाठी आली होती. ओळख झाल्यानंतर आरोपी तेजसने तरुणीशी प्रेमसंबंध प्रस्थापित केले. त्यानंतर त्याने तिच्यावर लैंगिक अत्याचार केले.
जानेवारी महिन्यात नाशिक येथील हॉटेलमध्ये थांबलेले असताना आरोपीने तरुणीचा मोबाइल फोन, मतदार कार्ड काढून घेतले. त्यानंतर तरुणीला १३ फेब्रुवारीला पुण्यातील मामलेदार कचेरी येथे विवाह नोंदणी करू, असे सांगून दोघेही पुण्यात आले. दरम्यान तरुणी स्वच्छतागृहात गेली असता, आरोपी तेजस पळून गेला. तरुणीने विश्वासाने दिलेली कागदपत्रेही तो घेऊन गेला. या प्रकरणी तेजस आणि त्याला मदत करणाऱ्या त्याच्या साथीदारांवर गुन्हा दाखल करण्यात आला आहे.
