मॉस्को – आपल्या मुलांनी शाळेत जावं, शिक्षण पूर्ण करून आयुष्यात यशस्वी व्हावे अशी सगळ्याच पालकांची इच्छा असते. त्यासाठी मुलांनी शाळेत जावे यासाठी पालक मुलांच्या मागे तगादा लावतात. असा तगादा लावणे एका कुटुंबीयांच्या जीवावर बेतले. एका अल्पवयीन मुलाने आई-वडिलांसह लहानग्या बहिणीची कुऱ्हाडीने हत्या केली असल्याची धक्कादायक घटना समोर आली आहे.
रशियामधील ही धक्कादायक घटना असून पोलिसांना हत्येचा उलगडा करण्यास बराच वेळ लागला. १७ वर्षीय वदीम गोरबुनोव यांने आपल्या आई-वडिलांसह लहान बहिणीची कुऱ्हाडीने वार करून हत्या केली. या हत्या केल्यानंतर वडिलांच्या मृतदेहाची ओळख पटू नये यासाठी त्याने चेहरा व शरिरावर आणखी वार केले आणि आपले कपडे घातले. जेणेकरून पोलिसांना मुलाचा मृतदेह असल्याची खात्री पटली पाहिजे. या आरोपी मुलाच्या वडिलांचे वय ४० वर्ष होते. ते वेल्डर म्हणून काम करत होते. हत्येनंतर आरोपी मुलगा पळून गेला होता. तपासाच्या सुरुवातीला वडिलांनीच घरातील सगळ्यांची हत्या केली, असा कयास पोलिसांनी बांधला होता.
त्यानंतर न्यायवैद्यक प्रयोगशाळेत मृतदेह आणि इतर बाबींची योग्य तपासणी करण्यात आली. त्यावेळी तो मृतदेह वडिलांचा असल्याचे समोर आले. त्यानंतर पोलिसांनी आरोपी वदिमला घटनास्थळापासून ३६२ किमी दूर असलेल्या ठिकाणावरून अटक केली. पोलिसांना मुलाची आई आणि १२ वर्षीय मुलीचा मृतदेह घरातच सापडला होता.
पोलीस चौकशीत आरोपी वदिमने आपणच हत्या केली असल्याची कबुली दिली. वदिमला शाळेत जाण्याची इच्छा नव्हती. तर, त्याची आई बळजबरीने त्याला शाळेत पाठवण्याची तयारी करत होती. त्या मुद्यावरून दोघांमध्ये कडाक्याचे भांडण झाले. त्यावेळी संतापलेल्या वदिमने आपल्या आईची कुऱ्हाडीने हत्या केली. त्यानंतर बहिणीला ठार केले. त्यानंतर घरी आलेल्या वडिलांवरही त्याने हल्ला केला आणि त्यांची हत्या केली. ‘डेली मेल’ने दिलेल्या वृत्तानुसार, वदिमला गणित विषय आवडत नव्हता. त्याने गणिताच्या तासातून त्याने काहीवेळेस पळही काढला होता.
