नागपूर (कार्यालय प्रतिनिधी) – गोंदिया जिल्ह्यातील आमगाव येथील माजी आमदार संजय पुराम यांच्या वडिलांकडे धाडसी घरफोडी करून चोरट्यांनी रोख रकमेसह सहा लाखांचे दागिने लंपास केले.
ही घटना शुक्रवारी सकाळी बेलतरोडीतील गोंडवानानगर येथे उघडकीस आली. जानूभाऊ पुनाजी पुराम (वय ७२) यांनी दिलेल्या तक्रारीवरून बेलतरोडी पोलिसांनी घरफोडीचा गुन्हा दाखल केला. संजय पुराम याच्याकडे ४ मार्चला कार्यक्रम होता. यासाठी जानूभाऊ कुटुंबीयांसह गोंदिया येथे गेले. संधी साधून चोरट्याने दाराचे कुलूप तोडले.
कपाटातील २५ हजारांची रोख, घड्याळ व दागिने चोरी केले. शुक्रवारी सकाळी शेजाऱ्याला पुराम यांच्या घराचे दार उघडे दिसले. त्याने जानूभाऊ यांना माहिती दिली. जानूभाऊ नागपुरात आले व बेलतरोडी पोलिसांत तक्रार दिली. पोलिसांनी घरफोडीचा गुन्हा दाखल करून चोरट्यांचा शोध सुरू केला आहे.
