नवी मुंबई (प्रतिनिधी विरेंद्र म्हात्रे) – लोकलमधून विनातिकीट प्रवास करताना पकडल्या गेलेल्या एका तरुणाने तिकीट तपासनीस व आरपीएफ जवानांना धक्काबुक्की करून तसेच, धमकावून पलायन केल्याची घटना नेरुळ स्थानकात घडली. राहुल पवार असे या तरुणाचे नाव असून वाशी पोलिसांनी त्याच्यावर सरकारी कामात अडथळा आणल्याप्रकरणी गुन्हा दाखल करून त्याचा शोध सुरू केला आहे.
या घटनेतील तक्रारदार आनंद पावले हे हेड तिकीट कलेक्टर या पदावर कार्यरत असून १६ मार्च रोजी ते नेरुळ रेल्वे स्थानकात कार्यरत होते. दुपारी ३ वाजण्याच्या सुमारास ठाणे लोकलमधून आलेल्या आरोपीकडे त्यांनी तिकिटाची मागणी केली असता त्याने पावले यांच्याशी हुज्जत घालून धक्काबुक्की केली. पावले यांनी त्याला आरपीएफच्या जवानांच्या स्वाधीन केले.
आरपीएफचे जवान त्याला बेलापूरच्या आरपीएफ पोलिस ठाण्यात नेत असताना त्याने या जवानांना धक्काबुक्की करून, त्यांच्या तावडीतून रेल्वे रुळातून पनवेलच्या दिशेने पलायन केले. या प्रकरणी पावले यांनी आरोपीविरोधात पनवेल रेल्वे पोलिस ठाण्यात जाऊन तक्रार दाखल केली.
