नवी मुंबई (प्रतिनिधी विरेंद्र म्हात्रे) – ही जमीन आमच्या मालकीची आहे, तुम्ही या जमिनीवर यायचे नाही अशी दहशत निर्माण करून एका शेतकरी कुटुंबाला स्वत:च्याच शेतात जाण्यापासून रोखणाऱ्या पाच जणांविरोधात तळोजा पोलिस ठाण्यात अखेर गुन्हा दाखल केला आहे. विशेष म्हणजे या प्रकरणात सातवेळा अदखलपात्र गुन्हा दाखल करूनही तळोजा पोलिसांनी त्यांच्या तक्रारीची दखल घेतली नव्हती.
तळोजा एमआयडीसीला लागून असलेल्या तोंडरे गावात मोतीराम पाटील यांची शेतजमीन आहे. अनेक वर्षांपूर्वी विकत घेतलेल्या त्यांच्या जमिनीवर गावातील काही लोक हक्क सांगत होते. त्यामुळे विरोधक आणि शेतकऱ्यांमध्ये वाद होत असत. पोलिस ठाण्यात तक्रार करूनही पोलिस या प्रकाराकडे दुर्लक्ष करीत होते. त्यामुळे काही महिन्यांपूर्वी पाटील कुटुंबीयांनी त्यांच्या जमिनीची भूमि अभिलेख विभागाकडून मोजणी करून घेतली. मोजणी केल्यानंतर त्यांच्या मालकीचे क्षेत्र ठरवून दिल्यामुळे मोतीराम पाटील याच्या मालकीच्या जमिनीला कुंपण घालण्यात आले. या शेतजमिनीत ३ दिवसांपूर्वी जमीनमालक मोतीराम पाटील यांच्या पत्नी मीनाबाई पाटील (वय ४५) या झाडे लावण्यासाठी गेल्या होत्या. सोबत स्टीफन मंगल (वय २७) हा होता. झाडे लावण्यासाठी शेताच्या रस्त्यावर रुपेश पाटील आणि राजेश पाटील या दोघांनी रस्तात डम्पर लावून रस्ता अडविला होता.
मीनाबाई त्यांना कोणताही विरोध न करता शेतात जाऊ लागल्या असता ही जागा आमची आहे, आमच्या शेतात तुम्ही प्रवेश करायचा नाही अशी दमदाटी या दोघांनी केली. मजूर स्टीफन यास धक्काबुक्की करून प्रवेश करण्यास मज्जाव केला. मीनाबाई यांनी त्याचा बचाव करण्याचा प्रयत्न केला असता महेश पाटील यांच्या सांगण्यावरून रुपेश पाटील, राजेश पाटील, संदीप रामा पाटील, सखाराम गोंधळी यांनी या दोघांनाही शेतात जाऊ न देता शिवीगाळ व धक्काबुक्की करून रस्ता अडवला. या प्रकरणी या पाचही जणांविरोधात तळोजा पोलिस ठाण्यात गुन्हा नोंदविण्यात आला आहे. पुढील तपास पोलिस उपनिरीक्षक जनार्दन पार्टे हे करीत आहेत.
