ठाणे (उपसंपादक सतीश बनसोडे) – दलापूर पश्चिमेतील रितू वर्ल्ड या गृहसंकुलात एका ज्येष्ठ नागरिकाने आपल्या राहत्या घरात तीन पाळीव कुत्र्यांसह स्वत:ला पेटवून घेतल्याचा धक्कादायक प्रकार समोर आला आहे. या घटनेत सदर इसम आणि दोन कुत्र्यांचा होरपळून दुर्दैवीरित्या मृत्यू झाला असून, एक कुत्रा बचावला आहे. या आत्महत्येमागचे कारण अद्यापही स्पष्ट झालेले नाही. सत्यप्रित चॅटर्जी असे स्वत:ला जाळून घेत आत्महत्या करणाऱ्या व्यक्तीचे नाव असून सत्यप्रित हे या इमारतीत भाडेतत्त्वावर घर घेऊन राहत होते.
बदलापूर पश्चिम भागातील रितू वर्ल्ड या इमारतीत शुक्रवारी सायंकाळी पाच वाजण्याच्या सुमारास अचानक आगीच्या झळा बाहेर येऊ लागल्या. या घटनेची माहिती मिळताच इमारतीतील तरुणांनी वर धाव घेतली तसेच अग्निशमन दल आणि पोलिसांशी संपर्क साधला. अग्निशमन दलाने दरवाजा तोडून घरात प्रवेश केला असता चॅटर्जी यांनी आपल्या घरातील बेडरूमला कडी लावत आणि त्या दरवाजाच्या समोर लोखंडी कपाट ठेवून स्वतःला पेटवून घेतले.
चॅटर्जी यांच्यासह बेडरूममध्ये तीन पाळीव कुत्रेदेखील अग्निशमन दलाला आढळून आले. मात्र या आगीत चॅटर्जी आणि दोन कुत्र्यांचा होरपळून मृत्यू झाला असून, एक कुत्रा जखमी असून बचावला असल्याची माहिती सहायक पोलिस आयुक्त विनायक नराळे यांनी दिली आहे. चॅटर्जी यांच्या दोन्ही पत्नी त्यांच्यापासून विभक्त राहत होत्या. त्यामुळे निराशेतून त्यांनी हे पाऊल उचलल्याची शक्यता वर्तवली जात आहे. या प्रकरणी बदलापूर पोलिस अधिक तपास करीत आहेत.
