नागपूर (कार्यालय प्रतिनिधी) – कधी गांजा, कधी मोबाइल तर कधी कैद्यांचे पलायन, अशा विविध कारणांनी सतत चर्चेत राहिलेले नागपूर मध्यवर्ती कारागृह आता परत एकदा अत्याचाराच्या प्रकरणामुळे चर्चेत आले आहे. नागपूर मध्यवर्ती कारागृहात कच्चा कैदी म्हणून राहत असलेल्या एक किन्नरने त्याच्यावर अत्याचार झाल्याचा खळबळजनक आरोप करणारी याचिका मुंबई उच्च न्यायालयाच्या नागपूर खंडपीठापुढे दाखल केली आहे.
या किन्नरच्या म्हणण्यानुसार, कारागृहात कर्तव्यावर असलेले कर्मचारी आणि कैदी यांनी त्याच्यावर अत्याचार केला. तुरुंग प्रशासनानेही त्याच्या तक्रारींकडे बराच काळ दुर्लक्ष केल्याने अखेर या किन्नरने मुंबई उच्च न्यायालयाच्या नागपूर खंडपीठात धाव घेतली आहे. शहरातील बहुचर्चित चमचम गजभिये हत्याकांडात या किन्नरला अटक करण्यात आली आहे. तो सध्या कच्चा कैदी म्हणून कारागृहात आहे. त्याला पुरुष बॅरेक्समध्ये ठेवण्यात आले आहे.
या प्रकरणातील अन्य आरोपी किन्नरांना जामीन मिळाला. मात्र, हा किन्नर अद्यापही कारागृहातच आहे. त्यामुळे त्याने अनेकदा कारागृह प्रशासनाकडे आपल्याला वेगळे बॅरेक मिळावे, यासाठी विनंती केली. मात्र त्याकडे दुर्लक्ष करण्यात आले. या काळात काही कारागृह कर्मचारी आणि कैद्यांनी त्याच्यावर अत्याचार केला, असा आरोप त्याने या याचिकेद्वारे केला आहे.
या किन्नराने हवालदार सचिन टिचकुले, पोलिस उपनिरीक्षक कारपांडे, भोसले, कैदी मुकेश यादव आणि दर्शनसिंह कपूर यांच्यावर अत्याचाराचा आरोप लावला आहे. कारागृह प्रशासनाने त्याच्या तक्रारींकडे दुर्लक्ष केले. तसेच जिल्हा न्यायालयालासुद्धा पत्र लिहिले. मात्र, त्यातूनही काही साध्य न झाल्याने अखेर त्याने उच्च न्यायालयात धाव घेतली आहे. याप्रकरणी अॅड. राजेश नायक यांनी याचिकाकर्त्याची बाजू मांडली. न्यायालयाने याप्रकरणी कारागृह अधीक्षक, उप महानिरीक्षक कारागृह यांना नोटीस बजावली आहे.
