पुणे (प्रतिनिधी सुनिल भोसले) – महिलेला लग्नाचे आमिष दाखवून तिच्यावर बलात्कार केल्याच्या आरोपावरून पोलिस मुख्यालयातील हवालदारावर शिवाजीनगर पोलिस ठाण्यात गुन्हा दाखल करण्यात आला. गुन्हा दाखल केल्यास आत्महत्या करण्याची धमकी संबंधित पोलिसाने महिलेला दिली होती.
याबाबत ४० वर्षीय पीडित महिलेने तक्रार दिली. त्यानुसार रामदास दत्तोबा थोरात (वय ४०, रा. हडपसर) याच्याविरोधात गुन्हा दाखल करण्यात आला. २०१६ ते २०२० दरम्यान ही घटना घडली. पोलिसांनी दिलेल्या माहितीनुसार, थोरात याने पीडित महिलेला लग्नाचे आमिष दाखवून बलात्कार केला.
त्यानंतर चूक झाल्याचे मान्य करून, घर घेण्याचे आणि महिन्याला दहा हजार रुपये देऊन सांभाळ करण्याचे आमिष दाखविले. पत्नी म्हणून सांभाळ करतो, असे लिहूनही दिले. याशिवाय बलात्काराच गुन्हा दाखल केल्यास महिलेच्या कुटुंबातील व्यक्तींची नावे चिठ्ठीत लिहून आत्महत्या करण्याची धमकी पोलिसाने दिली होती. या प्रकरणी महिलेने शिवाजीनगर पोलिस ठाण्यात तक्रार दिली. त्यानुसार शिवाजीनगर पोलिस ठाण्यात बलात्काराचा गुन्हा दाखल करण्यात आला.
