धौलपूर (राजस्थान) – येथे एक धक्कादायक घटना उघडकीस आली आहे. पती अनैसर्गिक अत्याचार करत असून, सासरा बलात्कार करत असल्याचा आरोप एका २४ वर्षीय महिलेने केला आहे. पती आणि सासऱ्याविरोधात तक्रार घेऊन महिला पोलीस ठाण्यात गेली असता, पोलिसांनी तक्रार दाखल करून घेण्यास नकार दिला. त्यानंतर महिलेने कोर्टात धाव घेतली. कोर्टाच्या आदेशानंतर पोलिसांनी गुन्हा दाखल केला आहे.
राजस्थानमधील धौलपूर जिल्ह्यातील बाडी पोलीस ठाण्याच्या हद्दीतील महिलेने यासंबंधी तक्रार दिली आहे. लग्नाच्या पाच महिन्यांनंतर पती जीवे मारण्याची धमकी देऊ लागला. अनैसर्गिक शरीरसंबंध ठेवण्यासाठी जबरदस्ती करत होता. गरोदर राहिल्यानंतर गर्भपात केला, असा आरोप महिलेने केला आहे. पीडितेने आपल्या सासऱ्यावरही आरोप केले आहेत. सासऱ्याने देखील जीवे मारण्याची धमकी देऊन बलात्कार केला, असा आरोपही तिने केला आहे.
सासरची मंडळी हुंड्यासाठी मानसिक आणि शारीरिक छळ करत असल्याचा आरोप तिने केला आहे. पाच लाख रुपये माहेरहून आणण्यासाठी तिचा छळ केला जात होता. पोलिसांनी कोर्टाच्या आदेशानंतर आरोपींविरोधात गुन्हा दाखल केला आहे. पीडितेची वैद्यकीय चाचणी करण्यात आली आहे. दाखल केलेल्या तक्रारीनुसार, लग्नानंतर १५ दिवसांनी सासरची मंडळी हुंडा म्हणून पाच लाख रुपयांची मागणी करू लागले. पीडितेने आपल्या माहेरच्या लोकांना याबाबत सांगितले. मात्र, त्यांनी पैसे देण्यास नकार दिला. त्यानंतर सासरच्यांनी तिचा मानसिक आणि शारीरिक छळ करण्यास सुरुवात केली.
