पुणे (प्रतिनिधी सुनिल भोसले) – कोंढवा भागात गांजा, चरस अशा अंमली पदार्थांची विक्री करणाऱ्या महिलेला अंमली पदार्थविरोधी पथकाने अटक केली. तिच्याकडून २१ किलो गांजा, मोबाइल असा सहा लाख ५७ हजार रुपयांचा मुद्देमाल जप्त करण्यात आला.
समीना मेहमूद शेख (वय ३५, रा. नझारा मंजिल, भाग्योदयनगर, कोंढवा) असे अटक करण्यात आलेल्या महिलेचे नाव आहे. शेख घरातून अंमली पदार्थांची विक्री करीत असल्याची माहिती पोलिस नाईक मनोज साळुंके यांना मिळाली होती. त्यानुसार पोलिसांच्या पथकाने तेथे पाळत ठेवली होती. त्यानंतर पोलिसांनी शेखच्या घरावर कारवाई करून तेथून २१ किलो गांजा, ५६९ ग्रॅम चरस, मोबाइल असा मुद्देमाल जप्त केला.
पोलिस उपायुक्त श्रीनिवास घाडगे यांच्या मार्गदर्शनाखाली वरिष्ठ पोलिस निरीक्षक विनायक गायकवाड, सहायक निरीक्षक लक्ष्मण ढेंगळे यांच्या पथकाने ही कारवाई केली. ही महिला गांजा व इतर अंमली पदार्थ कोठून आणत होती याचा तपास सुरू आहे.
