पुणे (प्रतिनिधी सुनिल भोसले) – चेकद्वारे पंधरा लाख रुपये घेऊन नंतर बदनामी केल्याने एकाने गाडीखाना येथील आरोग्य केंद्रातच गळफास घेऊन आत्महत्या केल्याचा धक्कादायक प्रकार उघडकीस आला आहे. संबंधिताने लिहिलेल्या सुईसाइड नोटवरून एका व्यक्तीच्या विरोधात आत्महत्येला प्रवृत्त केल्याचा गुन्हा दाखल करण्यात आला आहे.
विजयानंद तांदळे (रा. किरकटवाडी) असे आत्महत्या करण्यात आलेल्या व्यक्तीचे नाव आहे. याबाबत त्यांचा मुलगा यश तांदळे (वय २४ , रा. किरकटवाडी) यांनी तक्रार दिली आहे. त्यावरून धनंजय नानासाहेब घुले (रा. फुरसुंगी) याच्यावर गुन्हा दाखल करण्यात आला आहे.
पोलिसांनी दिलेल्या माहितीनुसार, तांदळे आणि संशयित आरोपी घुले मित्र आहेत. ते गाडीखाना येथील आरोग्य केंद्रात कामाला होते. तेथे असताना दोघांमध्ये आर्थिक देवाणघेवाणीचे व्यवहार झाले होते. घुले याने तांदळे यांच्याकडून १५ लाख रुपये चेकद्वारे घेतले होते. परंतु, घुले याने त्याला माहीत नसलेल्या व्यक्तीशी तांदळे यांचे संबंध जोडून त्यांची बदनामी केली. यामुळे तांदळे यांनी २४ मार्च रोजी गाडीखाना येथील कार्यालयातच गळफास घेऊन आत्महत्या केली. त्याबाबत सर्व सुईसाइड नोटमध्ये लिहून ठेवले होते. त्यावरून हा गुन्हा दाखल करण्यात आला आहे. याप्रकरणी पोलिस उपनिरीक्षक संजय पांढरे अधिक तपास करत आहेत.
