बिजनौर (उत्तर प्रदेश) – येथे एक विचित्र प्रकार उघड झाला आहे. एका चोराने साथीदाराच्या मदतीने चोरी केली. चोरीनंतर त्याच्या वाट्याला मोठी रक्कम आली. ही रक्कम त्याने आयुष्यात कधीच पाहिली नव्हती. एकाच वेळी लाखो रुपये पाहून त्याला हृदयविकाराचा झटका आला. हेच चोरीचे पैसे त्याला उपचारांवर खर्च करावे लागले. देहात परिसरात गेल्या महिन्यात चोरी झाली होती. या चोरीच्या प्रकरणात एका आरोपीला अटक करण्यात आली. त्याने दिलेल्या माहितीनंतर हा सगळा प्रकार उघडकीस आला.
बिजनौर पोलीस अधीक्षक धर्मवीर सिंह यांनी सांगितले की, १६ आणि १७ फेब्रुवारी रोजी रात्री दोन चोर हैदरच्या पब्लिक सर्व्हिस सेंटरमध्ये घुसले आणि त्यांनी चोरी केली. हैदर पोलिसांत सात लाख रुपये आणि किंमती वस्तू चोरीला गेल्याची तक्रार दाखल झाली. पोलिसांनी गुन्हा दाखल करून या प्रकरणातील आरोपींचा शोध सुरू केला.
या प्रकरणाचा तपास करणाऱ्या पोलिसांनी बुधवारी नगीना पोलीस ठाण्याच्या हद्दीतील अलीपूर येथून आरोपी नौशाद आणि एजाज या दोघांना अटक केली. दोघांची कसून चौकशी केली. आरोपींना एका रेस्तराँमधून अटक केली, अशी माहिती पोलिसांनी दिली. आरोपी हा सराईत गुन्हेगार आहे. त्याच्या विरोधात विविध पोलीस ठाण्यात गुन्हे दाखल आहेत. त्यांनी पब्लिक सर्व्हिस सेंटरमध्ये चोरी केली. या सेंटरमध्ये आम्हाला एक-दोन हजार रुपये मिळतील असे वाटले होते. मात्र, मोठी रक्कम बघून खूपच खूश झालो. त्यांनी चोरीची रक्कम वाटून घेतली. रक्कम पाहून एजाजला हृदयविकाराचा झटका आला. त्याला एका खासगी रुग्णालयात दाखल करण्यात आले. उपचारांवर चोरी केलेली रक्कम खर्च झाली. नौशादने दिल्लीत सट्ट्यावर रक्कम लावली होती. त्यात तो सर्व पैसे हरला, अशी माहिती चौकशीत उघड झाली.
पोलिसांनी सांगितले की, आरोपींच्या जवळील ३.७ लाख रुपये आणि दोन पिस्तुले जप्त केली आहेत. चोरांकडून एक दुचाकीही जप्त केली आहे. त्यांनी फुलसंडा गावातून चोरी केली होती. या प्रकरणाचा उलगडा करणाऱ्या तपास पथकाला पाच हजार रुपयांचे बक्षीस जाहीर करण्यात आले.
