भंडारा (क्राइम रिपोर्टर आसिफ कुरेशी) – बँकेकडून कर्ज घेतलेल्या रक्कमेच्या वसुलीसाठी बँक व्यवस्थापकाने एका महिलेच्या घरी जाऊन धमकी देत शारीरिक सुखाची मागणी केल्याचा धक्कादायक प्रकार घडला. या प्रकरणी सदर महिलेच्या तक्रारीवरून पोलिसांनी बँक व्यवस्थापकावर गुन्हा दाखल केला आहे.
भंडारा येथील अर्बन को-ऑप. बँक, शाखा भंडारा येथून शहरातील एका महिलेने लघू उद्योगाकरिता एक लाख रुपयाचे कर्ज दोन वर्षांपूर्वी घेतले होते. त्याचे दरमहा दोन हजार ८०० रुपयांचा हप्ता होता. कधी दोन महिन्यांनी तर कधी तीन महिन्यांनी हप्ता भरला जात होता. परंतु, करोना प्रादुर्भावामुळे सदर महिलेकडे पैसे नसल्याने बँकेच्या कर्जाचा हप्ता मागील तीन महिन्यांपासून भरण्यात आला नाही.
दरम्यान, २९ मार्च रोजी बँकेचे व्यवस्थापक भिवगडे हे सदर महिलेच्या घरी गेले. कर्जाची परतफेड केली नाही म्हणून आताचे आता २० हजार देण्यास सांगितले. तेव्हा महिलेने पुढच्या महिन्याच्या ५ तारखेला रक्कम परत करते, असे सांगितले. त्यानंतर बँक व्यवस्थापकाने २० हजार रुपये द्या, नाहीतर तुम्हाला एक रात्र माझ्यासोबत काढावी लागेल. तसेच असभ्य वक्तव्य करून धमकी दिली.
याप्रकरणी सदर महिलेने भंडारा पोलिस ठाणे गाठून तक्रार दिली. पोलिसांनी बँक व्यवस्थापक भिवगडे यांचेविरुद्ध भादंविच्या कलम ५०९ अन्वये गुन्हा नोंदविला आहे. तपास पोलिस उपनिरीक्षक नागरगोचे करीत आहेत.
