अलवर (राजस्थान) – येथील बहरोड परिसरात पती-पत्नीच्या नात्याला काळिमा फासणारी घटना घडली आहे. जखराना गावाजवळ बाबू नावाच्या व्यक्तीच्या हत्येचा उलगडा करण्यात पोलिसांना यश आले आहे. या घटनेत खळबळजनक माहिती उघड झाली आहे.
पोलिसांच्या माहितीनुसार, हरयाणाच्या भूंगारका गावातील रहिवासी बाबू कृष्ण कुमारची पत्नी कुसुमलता हिनेच आपल्या पतीची हत्या केली आहे. त्याच्या हत्येची सुपारी तिने शेजारीच राहणारा सन्नी याला दिली होती. कुसुमलता हिचे त्याच्यासोबत प्रेमसंबंध होते. प्रेमात अडथळा ठरणाऱ्या पतीच्या हत्येचा कट तिने दीराच्या मदतीने रचला होता. पोलिसांनी या प्रकरणात पत्नी कुसुमलता, तिचा शेजारी सन्नीसह अन्य दोघांना अटक केली आहे.
पोलिसांनी दिलेल्या माहितीनुसार, दुचाकीवरून शाळेत जाताना बाबू कृष्ण कुमारला पाठीमागून कारने धडक दिली होती. त्यानंतर त्याला चाकाखाली चिरडण्यात आले. ही कार जयपूर येथून ताब्यात घेण्यात आली होती. बाबू महेंद्रगढ भुंगारका येथून दुचाकीवरून रोज बहरोडमधील जखराना येथे ड्युटीवर जायचा. तो नोकरीसाठी घराबाहेर पडल्यानंतर त्याचा शेजारी सन्नी त्याच्या घरी जायचा. त्याचवेळी बाबू कृष्ण कुमार याच्या पत्नीचे त्याच्यासोबत प्रेमसंबंध जुळले. त्याबाबत बाबूला समजले. त्यामुळे तो सन्नीवर चिडलेला होता. त्यानंतर पत्नी आणि सन्नीने त्याच्या हत्येचा कट आखला.
मिळालेल्या माहितीनुसार, या हत्येच्या कटात गावातीलच अशोक कुमार यालाही सामील करून घेतले. त्यानंतर कुसुमलता हिने चार लाख रुपये सन्नीला आणून दिले. सन्नीने याच पैशांतून गावातीलच एका व्यक्तीकडून कार खरेदी केली. कार अशोकच्या नावे खरेदी केली. कार घेतल्यानंतर अशोकने बाबू कृष्णकुमार याचा अनेकदा पाठलाग केला. मात्र, त्याला धडक देऊन त्याची हत्या करण्यात अपयशी ठरला होता. १ एप्रिलला सकाळी साडेसात वाजता तो आपल्या गावातून दुचाकीवरून नेहमीप्रमाणे जखरानाकडे निघाला. त्याची माहिती कुसुमलता हिने सन्नीला दिली. सन्नीने अशोकला सांगितले. त्याने दुचाकीला जोरदार धडक दिली. खाली पडल्यानंतर त्याच्या अंगावरून कार नेली. यामुळे बाबू कृष्णकुमार याचा जागीच मृत्यू झाला.
