ठाणे (उपसंपादक सतीश बनसोडे) – अर्नाळ्यातील जेट्टीचे काम करणाऱ्या कामगाराच्या पत्नीची छेडछाड केल्याचा प्रकार अर्नाळ्यात घडला होता. याचाच जाब विचारायला गेलेल्या या कामगाराला चार जणांनी मारहाण केली. उपचारादरम्यान त्याचा मृत्यू झाल्याची घटना मंगळवारी घडली. या प्रकरणी अर्नाळा पोलिस ठाण्यात गुन्हा दाखल करण्यात आला असून दोघांना अटक केली आहे.
अर्नाळा येथे जेट्टीचे काम सुरू आहे. त्यामुळे या ठिकाणी जेट्टीचे काम करणारे कामगार आपल्या परिवारासह राहत आहेत. यातील एका ४० वर्षीय कामगाराच्या पत्नीची अर्नाळा किनाऱ्यावर आलेल्या चार मद्यपींमार्फत छेड काढल्याचा प्रकार सोमवारी रात्री घडला होता. यावेळी पत्नीने आरडाओरडा केल्यानंतर तिचा पती घटनास्थळी येत त्याने त्या चौघांना याबाबत जाब विचारला. मात्र या चौघांनी कोणतेही उत्तर न देता या कामगाराला विटेच्या साहाय्याने मारहाण करण्यास सुरुवात केली.
यामध्ये गंभीर जखमी झालेल्या कामगारास तत्काळ रुग्णालयात दाखल करण्यात आले. मात्र उपचारादरम्यान मंगळवारी त्याचा मृत्यू झाला आहे. त्यामुळे अर्नाळा पोलिस ठाण्यात हत्येचा गुन्हा दाखल करण्यात आला असून त्यातील दोन आरोपीना पोलिसांनी अटक केली.
