आझमगढ (उत्तर प्रदेश) – येथील एका गावात लज्जास्पद आणि तितकीच चीड आणणारी घटना घडली आहे. सख्ख्या भावानेच आपल्या बहिणीवर बलात्कार केला. त्यानंतर त्याने बहिणीची गळा दाबून हत्या केली. तिचा मृतदेह घरातील पलंगामध्ये लपवून ठेवून घरातून फरार झाला. या घटनेने परिसरात खळबळ उडाली असून, आरोपी तरुणाविरोधात संताप व्यक्त करण्यात येत आहे.
मिळालेल्या माहितीनुसार, ही घटना आझमगढमधील गंभीरपूर पोलीस ठाण्याच्या हद्दीतील एका गावात घडली. सख्ख्या भावाने आपल्या बहिणीवर बलात्कार केला. त्यानंतर त्याची बहीण या घटनेबाबत घरात सांगेन, असे म्हणाली. त्यावर त्याने तिच्यावर सळईने वार केले. तसेच तिची गळा आवळून हत्या केली. धक्कादायक बाब म्हणजे, त्याने घरातील पलंगातच बहिणीचा मृतदेह लपवून ठेवला आणि घरातून पसार झाला.
मुलगी बेपत्ता झाल्याची माहिती तिच्या पालकांना आणि इतर कुटुंबीयांना मिळाली. त्यांनी सर्वत्र तिचा शोध घेतला. मुलगी बेपत्ता झाल्याची तक्रार पोलिसांत दिली. पोलिसांनी काही वेळात तिच्या भावाला पकडले. त्याच्याकडे बेपत्ता बहिणीबाबत विचारणा केली. सुरुवातीला त्याने उडवाउडवीची उत्तर दिली. मात्र, पोलिसांना संशय आल्यानंतर त्यांनी खाक्या दाखवताच आरोपीने गुन्ह्याची कबुली दिली. त्याने हकिकत सांगितल्यानंतर सगळ्यांच्याच पायाखालची वाळू सरकली.
आरोपीने दिलेल्या माहितीनुसार पोलिसांनी घरातील पलंगात असलेला मुलीचा मृतदेह ताब्यात घेतला. मुलीच्या पित्याने मुलाविरोधात पोलिसांत तक्रार दाखल केली आहे. पोलिसांनी आरोपी तरुणाविरोधात हत्या आणि बलात्काराचा गुन्हा दाखल केला आहे. आरोपीला अटक केली असून, त्याची रवानगी तुरुंगात केली आहे.
