पुणे (प्रतिनिधी सुनिल भोसले) – शहरात भारती विद्यापीठ आणि लोणी काळभोर पोलिस ठाण्याच्या हद्दीत झालेल्या घरफोडीत अडीच लाख रुपयांचा ऐवज चोरीला गेला आहे. त्यात सोन्याचे, चांदीचे दागिने इलेक्ट्रिक वस्तू आणि रोख रकमेचा समावेश आहे.
भारती विद्यापीठ पोलिस ठाण्याच्या हद्दीत आंबेगाव खुर्द येथील वाघजाईनगर येथे रवी देवजी चव्हाण यांच्या घरी चोरी झाली. ते १८ एप्रिल रोजी घराला कुलूप लावून हैदराबाद येथे गेले होते. तीन मे रोजी दुपारी एक वाजता त्यांच्या घरी चोरी झाल्याचे समोर आले. अज्ञात चोरट्याने घरातून २७ ग्रॅम सोन्याचे आणि ८०० ग्रॅम चांदीचे दागिने, इलेक्ट्रॉनिक वस्तू असा दोन लाख चार हजार रुपयांचा मुद्देमाल चोरून नेला.
लोणी काळभोर पोलिस ठाण्याच्या हद्दीत मंतरवाडी येथील गोल्ड सोसायटीत सोमनाथ बबन यादव (वय ३८) यांच्या घराचे कुलूप तोडून चोरी करण्यात आली आहे. चोरट्यांनी टीव्ही आणि २५ हजार रुपये रोख रक्कम चोरली आहे. ही चोरी सोमवारी रात्री १० ते मंगळवारी सकाळी सात या वेळेत झाली. या दोन्ही गुन्ह्यांप्रकरणी अज्ञातावर गुन्हा दाखल करण्यात आला आहे.
