नवी मुंबई (प्रतिनिधी विरेंद्र म्हात्रे) – पनवेलच्या वावंजे परिसरात राहणाऱ्या एका २५ वर्षीय तरुणाने ओळखीतील १६ वर्षीय अल्पवयीन मुलीसोबत व्हॉट्सअॅप कॉलच्या माध्यमातून तिची नग्न छायाचित्रे काढून ती सोशल मीडियावर व्हायरल करण्याची तसेच तिच्या वडिलांना दाखवून तिची बदनामी करण्याची धमकी दिल्याचा प्रकार उघडकीस आला आहे. या प्रकरणी मयूर मोहिते (२५) या तरुणावर पनवेल तालुका पोलिसांनी विनयभंगासह पोक्सो कलमाखाली गुन्हा दाखल करून त्याला अटक केली आहे.
ओळखीचा फायदा घेत मयूरने गेल्या महिन्यात पीडित मुलीसोबत व्हॉट्सअॅपवर व्हिडीओ कॉल करून तिला जबरदस्तीने कपडे काढण्यास भाग पाडले. त्यानंतर त्याने तिची नग्न छायाचित्रे व व्हिडीओ काढून घेतले. त्यानंतर त्याने व्हॉट्सअॅपवर चॅटिंगद्वारे संपर्क साधून तिची अश्लील छायाचित्रे सोशल मीडियावर व्हायरल केल्यास त्यातून चांगले पैसे मिळतील, असे सांगून तिला तशी छायाचित्रे काढण्यास सांगितले.
मात्र मुलीने तसे करण्यास नकार देऊन त्याच्यासोबत बोलणे बंद केले. त्यामुळे मयूरने त्याच्याकडील तिची नग्नावस्थेतील छायाचित्रे व व्हिडीओ सोशल मीडियावर व्हायरल करण्याची तसेच तिच्या वडिलांना ते दाखवून तिची बदनामी करण्याची धमकी दिली. पीडित मुलीने याबाबतची माहिती आईला दिल्यानंतर मुलीच्या आईने पनवेल तालुका पोलिस ठाण्यात तक्रार दाखल केली.
