मुलाच्या अनैतिक संबंधांचा जाब विचारते म्हणून केला जात होता छळ
पुणे (प्रतिनिधी सुनिल भोसले) – काँग्रेसचे ज्येष्ठ नेते व माजी राज्यमंत्री चंद्रकांत ऊर्फ बाळासाहेब शिवरकर यांच्यावर वानवडी पोलीस ठाण्यात घरगुती हिंसाचार कायद्यांतर्गत गुन्हा दाखल करण्यात आला आहे. शिवरकर यांच्या सुनबाई स्नेहा शिवरकर (वय ३७) यांनी या प्रकरणी तक्रार केली होती. पतीच्या अनैतिक संबंधांचा जाब विचाल्यामुळं शिवरकर कुटुंबीयांनी आपला शारीरिक व मानसिक छळ केल्याचं स्नेहा यांनी तक्रारीत म्हटलं आहे.
स्नेहा यांच्या तक्रारीवरून त्यांचे पती अभिजीत बाळासाहेब शिवरकर (वय ३८), सासरे बाळासाहेब विठ्ठलराव शिवरकर (वय ६९), सासू कविता शिवरकर (वय ६६), नणंद सोनाली सिद्धार्थ परदेशी (वय ४० सर्व रा. बीटी कवडे रोड उद्यानबाग जवळ वानवडी पुणे ) यांच्या विरोधात गुन्हा दाखल करण्यात आला आहे.
सेन्हा अभिजीत शिवरकर या डॉक्टर आहेत. स्नेहा यांना डायबेटिस आहे. नोव्हेंबर २००९ रोजी अभिजित शिवरकर यांच्यासोबत त्यांचे लग्न झाले होते. तेव्हापासून घरात पती, सासू व नणंद किरकोळ गोष्टीवरून शिवीगाळ व मारहाण करत असत. आम्हाला डायबेटिक सून नको असं ते म्हणत. अभिजीत यांचे बाहेर अनैतिक संबंध असल्याचं स्नेहा यांना कळलं होतं. त्याबद्दल स्नेहा जाब विचारत असल्यानं सासरच्यांना राग येत असे. त्या रागातून स्नेहा यांचा छळ केला जाई. आमचे कुटुंब प्रतिष्ठित असून बाहेर कोठेही काही बोलू नको, असं म्हणत वारंवार शिवीगाळ, मारहाण केली जाई. मारण्याची धमकी देऊन शारीरिक व मानसिक छळ केला जाई, असं स्नेहा यांनी तक्रारीत नमूद केल्याची माहिती वानवडी पोलिसांनी दिली आहे. या प्रकरणी वानवडी पोलीस ठाण्यात कलम ४९८ (अ) नुसार पती, सासरे, सासू व नणंद यांच्या विरोधात गुन्हा दाखल करण्यात आला आहे. पुढील तपास पोलीस उपनिरीक्षक भूषण पोटवडे करीत आहेत.
