नवी मुंबई (प्रतिनिधी विरेंद्र म्हात्रे) – नामांकित कंपन्यांच्या हुबेहूब वस्तू तयार करून त्यावर संबंधित कंपन्यांचे ट्रेडमार्क लावून त्या बाजारात विक्री करून शासनाची व सर्वसामान्यांची फसवणूक करणाऱ्या व्यक्तीला तुर्भे एमआयडीसी पोलिसांनी पावणे एमआयडीसीतील एका गाळ्यावर छापा मारून अटक केली. या कारवाईत पोलिसांनी तब्बल २६ लाख ४४ हजारांच्या बनावट वस्तू व कच्चा माल जप्त केला आहे.
पावणे एमआयडीसीतील गामी इंडस्ट्रियल पार्क या इमारतीतील ६४ नंबरच्या गाळ्यामध्ये गोदरेज, हिंदुस्थान युनिलिव्हर, डाबर इंडिया लि. आयसी सोल्युशन, डायव्हरस्सी व इतर वेगवेगळ्या कंपन्यांच्या बनावट वस्तू बाजारात विकल्या जात असल्यची माहिती तुर्भे एमआयडीसी पोलिसांना मिळाली होती.
त्यानुसार वरिष्ठ पोलिस निरीक्षक राजेंद्र आव्हाड, सहाय्यक पोलिस निरीक्षक प्रभाकर शिऊरकर व त्यांच्या पथकाने परिमंडळ-१चे पोलिस उपायुक्त सुरेश मेंगडे यांच्या मार्गदर्शनाखाली छापा मारल्या असता तेथे नामांकित कंपन्यांच्या बनावट वस्तू दिसल्या. येथील वस्तूंवर संबंधित कंपन्यांचे ट्रेडमार्क लावले होते.
पोलिसांनी गोदरेज कंपनीच्या सात लाख ४० हजार रुपये किमतीच्या, हिंदुस्थान युनिव्हर्सल लि. च्या दोन लाख ७९ हजार, हेल्थ हायजेनिक होम कंपनीच्या आठ लाख २५ हजार, डाबर कंपनीच्या चार लाख ८९ हजार, इतर कंपनीच्या दोन लाख ४१ हजार रुपयांच्या वस्तू त्याचप्रमाणे ६८ हजार रुपये किंमतीचा कच्चा माल असा एकूण २६ लाख ४४ हजार रुपये किमतीच्या वस्तू व माल जप्त केला आहे.
