कानपूर – राष्ट्रपती रामनाथ कोविंद कानपूर दौऱ्यावर आहेत. या दौऱ्यामुळे शहरात अनेक ठिकाणी वाहतुकींच्या रस्त्यांमध्ये बदल करण्यात आले आहेत. याच वेळी निर्माण झालेल्या ट्रॅफिकमध्ये अडकून एका महिलेचा मृत्यू झाल्याची धक्कादायक घटना समोर आली आहे. महिलेला उपचारासाठी रुग्णालयात नेले जात असताना वाहतूक बंद करण्यात आली होती. यावेळी ट्रॅफिकमध्ये अडकलेल्या महिलेची प्रकृती अधिकच बिघडली. रुग्णालयात पोहोचली तेव्हा खूपच उशीर झाला होता. त्यामुळे डॉक्टरांनी महिलेला मृत घोषित केले.
याबाबत समजलेली अधिक माहिती अशी की, भारतीय उद्योग संघटनेच्या स्थानिक महाविद्यालयाच्या महिला शाखेच्या अध्यक्ष वंदना मिश्रा यांची तब्येत बिघडल्याने त्यांना हॉस्पिटलला नेण्यात येत होते. मात्र त्या गोविंदपुरी पुलावरील ट्रॅफिकमध्ये अडकल्या होत्या. तिथे तैनात असलेल्या पोलिसांना मिश्रा यांच्या कुटुंबीयांनी वारंवार विनंती केली. मात्र विनंती करूनही परवानगी दिली नसल्याचं परिवाराने म्हटलं आहे. त्यानंतर कानपूरचे पोलिस आयुक्त असीम अरुण यांनी या घटनेबद्दल दिलगिरी व्यक्त केली आहे.
दरम्यान, या प्रकरणात पोलीस उपनिरीक्षक आणि तीन हेड कॉन्स्टेबलना निलंबित करण्यात आले आहे. पोलीस उपायुक्त स्तरावरील अधिकाऱ्यांकडून घटनेचा तपास सुरू असल्याची माहिती दिली आहे. जर वेळेत रुग्णालयात पोहोचलो असतो तर वंदना यांचा जीव वाचला असता असं म्हटलं आहे.
महामहिम राष्ट्रपति जी बहन वन्दना मिश्रा जी के असामयिक व निधन से व्यथित हुए। उन्होंने पुलिस आयुक्त और जिलाधिकारी को बुलाकर जानकारी ली व शोक संतप्त परिवार तक उनका संदेश पहुंचाने को कहा। दोनों अधिकारियों ने अंत्येष्टि में शामिल होकर शोकाकुल परिवार तक महामहिम का संदेश पहुंचाया। pic.twitter.com/nIYKQZNj4e
— POLICE COMMISSIONERATE KANPUR NAGAR (@kanpurnagarpol) June 26, 2021
कानपूर पोलीस आयुक्तालयाच्या अधिकृत ट्विटर हँडलने मिश्रा यांच्या मृत्यूबद्दल दिलगिरी व्यक्त केली. “राष्ट्रपती, बहीण वंदना मिश्रा यांच्या अकाली निधनामुळे अस्वस्थ झाले आहेत. त्यांनी पोलीस आयुक्तांना व जिल्हा दंडाधिकाऱ्यांना बोलावून माहिती घेतली आणि शोकग्रस्त कुटुंबापर्यंत आपला संदेश पोहचविण्यास सांगितले. दोन्ही अधिकारी अंत्यसंस्कारात हजर झाले आणि शोकसंतप्त कुटुंबाला राष्ट्रपतींचा संदेश दिला” असं ट्विटमध्ये म्हटलं आहे.
