शिर्डी (प्रतिनिधी संजय महाजन) : शिर्डीच्या साईबाबा संस्थानच्या मुख्य कार्यकारी अधिकारीपदी भाग्यश्री बानायत-धिवरे यांची नियुक्ती करण्यात आली आहे. कान्हुराज बगाटे यांच्या जागी त्यांची नियुक्ती करण्यात आली.
नव्याने सीईओ म्हणून नियुक्ती झालेल्या भाग्यश्री बानायत २०१२ च्या बॅचच्या आयएएस अधिकारी आहेत. सध्या त्या नागपूर येथे रेशीम उद्योग संचालनालयात संचालक म्हणून कार्यरत होत्या. त्या मूळच्या नागपूर जिल्ह्यातील आहेत. आयएएस झाल्यानंतर त्यांची नागालँड केडरमध्ये निवड झाली. २०१८ मध्ये त्या प्रतिनियुक्तीवर महाराष्ट्रात परतल्या आहेत. त्यांनी मोठ्या कष्टाने शिक्षण पूर्ण केले असून आतापर्यंतच्या नोकरीत आपली छाप पाडली आहे. महाराष्ट्रात परत आल्यानंतर रेशीम उद्योग संचालयानालयात कार्यरत असताना त्यांनी कोरोना काळात केलेली कामगिरी कौतुकास्पद ठरली. त्यांना अनेक सन्मानही मिळाले आहेत.
दरम्यान, सध्याचे सीईओ बगाटे यांची नियुक्ती वादग्रस्त ठरली. नियुक्तीच्यावेळी आयएएस नसल्याने त्यांच्या नियुक्तीला आव्हान देणारी याचिका उच्च न्यायालयात दाखल झाली आहे. याशिवाय त्यांच्या कामकाजाबद्दल इतरही अनेक तक्रारी झाल्या. न्यायालयात याचिका प्रलंबित असतानाच त्यांची बदली झाली असून मंगळवारी झालेल्या बदल्यांमध्ये त्यांच्या नव्या नियुक्तीचे ठिकाण मात्र दाखविण्यात आलेले नाही.
शिर्डी संस्थानच्या नव्या विश्वस्त मंडळाच्या नियुक्तीचा विषयही न्यायालयात गेला आहे. ती प्रक्रियाही रखडली आहे. या पार्श्वभूमीवर सीईओपदी महिला अधिकाऱ्याची करण्यात आलेली नियुक्ती महत्त्वाची मानली जात आहे.
