अमरावती (प्रतिनिधी आसिफ कुरैशी) : नातेवाईकांकडून दहाव्याचा कार्यक्रम आटोपून सपत्नीक घराकडे येणाऱ्या बाईकस्वाराच्या पत्नीची साडी धावत्या दुचाकीत अडकून घडलेल्या अपघातात पत्नीचा घटनास्थळीच मृत्यू झाला आहे. ही दुर्दैवी घटना धारणी तालुक्यातील कढाव फाट्यानजीक आंतरराज्यीय महामार्ग क्रमांक ६ वर आज दुपारच्या दरम्यान घडली.
सूत्रांकडून मिळालेल्या माहितीनुसार, आशा अनिल दारशिंबे ( ३८ वर्ष ) रा. ढाकरमल मृत महीलेचे नाव असून ती १ सप्टेंबर रोजी नवरा अनिल भैय्यालाल दारशिंबे आणि पत्नी आशा अनिल दारशिबे असे हे दोघेजण बहीणीचा सासरा वारल्यामूळे दुणी या गावी दहाव्यासाठी गेले होते.कार्यक्रम आटोपून दोघे नवरा बायको परतीच्या प्रवासासाठी दुणी येथून दुचाकी हिरो होंडा एम. एच. २७ / के. ९२९७ क्रमांकाच्या दुचाकीवर बसून आपल्या राहत्या गावी ढाकरमल येथे येण्यासाठी निघाले होते. यादरम्यान अमरावती- बऱ्हाणपूर या महामार्गावर कढाव फाट्यावर धावत्या दुचाकीवर मागे बसलेली मृत आशा हिच्या साडीचा पदर दुचाकीच्या चाकात अडकून ती भर रस्त्यावर रस्त्यावर कोसळली.
अपघातानंतर धारणी येथे उपचारासाठी आणलेल्या आशा दारशिंबे यांचा अतीरक्तस्त्राव आणि ब्रेन हॅमरेज होऊन उपचार होण्याआधीच मृत्यू झाला. घटनेची माहिती मिळताच धारणी पोलीसांनी घटनास्थळी धाव घेत पंचनामा केला. पोलीस स्थानकात आकस्मिक मृत्यूची नोंद करण्यात आली असून मृतक महिलेचा मृतदेह धारणी येथे पाठवून शवविच्छेदनानंतर अंतिम संस्कारासाठी कुटूबियांच्या स्वाधीन करण्यात आला आहे. पूढील तपास पोलीस निरीक्षक सुरेंद्र बेलखेडे यांच्या मार्गदर्शनात सहाय्यक पोलीस निरीक्षिका ज्योत्स्ना महाजन व त्यांचे सहकारी करित आहे.
