पुणे (प्रतिनिधी सुनिल भोसले) : बांधकाम साईटवर आरएमसी टाकण्यासाठी कॉन्ट्रॅक्टरला दमदाटी करुन ४५ हजाराची खंडणी घेतल्याचा प्रकार दिघी पोलीस ठाण्याच्या हद्दीत उघडकीस आला आहे. बांधकाम साइटवर काँक्रिटचे काम करणाऱ्या कंत्राटदाराकडून तीस हजार रुपयांची खंडणी घेऊन फोन करुन एक लाख रुपये खंडणी मागितली.
याप्रकरणी दिघी पोलिसांनी तिघा बापलेकांना बेड्या ठोकल्या आहेत. हा प्रकार मागील पाच महिन्यापासून १० सप्टेंबर या कालावधीत काळजेवाडी चऱ्होली बुद्रुक येथील आवनी आवास या बांधकाम साईटवर घडला. सत्यवान ज्ञानेश्वर तापकीर (वय-४६), आकाश सत्यवान तापकीर (वय-२५), सागर सत्यवान तापकीर (वय-२३ तिघे रा. काळजेवाडी, चऱ्होली, पुणे) अशी अटक करण्यात आलेल्या बापलेकांची नावे आहेत. याप्रकरणी मनोज नरेश गुप्ता (वय-४४ रा. निगडी प्राधिकरण, पुणे) यांनी दिघी पोलीस ठाण्यात फिर्याद दिली आहे.
पोलिसांनी दिलेल्या माहितीनुसार, गुप्ता यांची काळजेवाडी येथे आवनी आवास नावाची बांधकाम साईट सुरु आहे. या ठिकाणी आरएमसी कॉन्ट्रॅक्टर चव्हाण आरएमसी मटेरियल पुरवतात. गुप्ता यांच्या साईटवर मटेरियल टाकण्यासाठी आरोपींनी चव्हाण यांना दमदाटी करुन ५० हजार रुपयाची खंडणी मागून ४५ हजार रुपये घेतले.
तसेच बांधकाम साईटवर हरीश पटेल हे काँक्रिटचे काम करतात. आरोपी आकाश याने त्यांना धमकावून ३० हजार रुपयाची खंडणी घेतली. १० सप्टेंबर रोजी आरोपी सत्यवान याने पटेल यांना फोन करुन एक लाख रुपयाची खंडणी मागितली. पैसे दिले नाही तर गाड्यांची तोडफोड करुन साईटवर येऊ देणार नाही, अशी धमकी दिली. याप्रकरणी पोलिसांनी तिघांना अटक केली असून पुढील तपास दिघी पोलीस करीत आहेत.
