धाराशिव (जिल्हा प्रतिनिधी सुरेश बागडे) : सख्खा भाऊ पक्का वैरी ही बोली भाषेतील म्हण सत्यात उतरले आहे. आरसोली, ता. भुम येथील विलास आबासाहेब गोयकर, वय ३३ वर्षे यांच्या गळ्यावर शस्त्राच्या वाराच्या जखमा असलेला मृतदेह २३सप्टेंबर रोजी देवळाली ते आरसोली रस्त्यालगतच्या चारीत आढळला होता. अज्ञात व्यक्तीने अज्ञात कारणासाठी विलास यांचा खून करुन पुरावा नष्ट करण्याच्या उद्देशाने मृतदेह त्या चारीत टाकला आहे. अशा मजकुराच्या मयताचा भाऊ- दिलीप आबासाहेब गोयकर यांनी दिलेल्या प्रथम खबरेवरुन परंडा पो.ठा. गु.र.क्र. क्र. ३२२ / २०२१ हा भा.दं.सं. कलम- ३०२, २०१ अंतर्गत नोंदवला आहे.
गुन्हा तपासादरम्यान कळंबचे सहायक पोलीस अधीक्षक- श्री. आर. रमेश यांसह पोनि- श्री. गजानन घाडगे यांच्यासह स्था.गु.शा. च्या पथकाने व पोनि- सुनिल गीड्डे यांच्यासह परंडा पो.ठा. च्या संयुक्त पथकाने तपास सुरु केला. मयताचा पिता- आबासाहेब रामलिंग गोयकर यांसह फिर्यादी भाऊ- दिलीप यांस वेगळे करुन सखोल विचारपूस केली असता दोघांच्या बोलण्यास तफावत आढळली. एकंदरीत विलास गोयकर (मयत) याने दि. 21.09.2021 रोजी रात्री मद्यधुंद अवस्थेत भाऊ- दिपक यास नित्याप्रमाणे शिवीगाळ करुन धक्काबूक्की केली. यातून चिडून जाउन दिलीप याने भाऊ विलास याच्या डोक्यात गळ्यावर कुऱ्हाडीचे घाव घातल्याने त्याचा मृत्यू झाला. यानंतर त्याने पिता- आबासाहेब यांच्या सहकार्याने विलास याचा मृतदेह पोत्यात भरून मोटारसायकवरून वाहून नेउन त्या चारीत टाकल्याचे निष्पन्न होताच त्या दोघांना वेगवेगळ्या ठिकाणांहुन अटक करण्यात आली.या खुन प्रकरणाचा तपास लावण्यासाठी घटनास्थळी धाराशिवच्या श्वान पथकाला पाचारण करण्यात आले होते .
श्वान प्लुटोने घटनास्थळा पासुन आरोपीचा आरोपीच्या घरा पर्यंत माग काढला होता या मुळे स्थानिक गुन्हा शाखेच्या पथकाने मयत विलास अबासाहेब गोयकर याचा भाऊ दिलीप अबासाहेब गोयकर यास संशयावरून ताब्यात घेतले व त्याच्याकडे खुन प्रकरणाची कसुन चौकशी केली.
आरोपी दिलीप गोयकर याची शनिवार दि २५ सप्टेंबर रोजी दुपारी परंडा पोलिस स्टेशनच्या आवारात श्वान प्लुटो कडून ओळख परेड घेण्यात आली. श्वान प्लुटोने आरोपी दिलीप गोयकर याच्या अंगावर झेपा घेऊन आरोपीची ओळख करून दिली आहे. धाराशिव चे पोलीस उपनिरीक्षक मस्के पोलीस हेडकॉन्स्टेबल स्वप्नील ढोणे पोलीस नाईक सुरज कोरडे यांच्या पथकाने आरोपीची ओळख करण्या साठी अरोपी सह इतर नागरीकांना परंडा पोलीस स्टेशनच्या आवारात उभे केले होते श्वान प्लुटोने पाकीट च्या वासावरून आरोपी दिलीप गोयकर याच्या अंगावर दोन वेळा झेप घेऊन आरोपीस ओळखले आहे. यावेळी परंडा पोलीस स्टेशनचे पोलिस निरिक्षक सुनिल गिड्डे पोलीस उप निरिक्षक हिंगे,पोकॉ शेंदारकर उपस्थित होते.
उपविभागीय पोलीस अधिकारी एम रमेश व स्थानीक गुन्हा शाखेचे पोलीस निरीक्षक गजानन घाडगे यांच्या मार्गदर्शनाखाली स्थानिक गुन्हा शाखेच्या पथकाने व परंडा येथील पोलीस पथकाने खुन प्रकरणातील आरोपीचा १२ तासात तपास लाऊन आरोपी दिलीप गोयकर व मयताचचे वडील अबासाहेब गोयकर यांना दि २४ रोजी रात्री अटक करून परंडा पोलिसांच्या ताब्यात घेतले.
