पुणे (प्रतिनिधी सुनिल भोसले) : दारु पित बसले असताना शिवीगाळ केल्याचा राग आल्याने, तिघांनी धारदार हत्याराने व लाथाबुक्क्यांनी मारहाण करुन तरुणाचा खून केला.
मंदार जोगदंड (वय २३, रा. साने गुरुजी वसाहत, आंबिल ओढा), सोन्या खुळे व इतर हे सोमवारी रात्री दारु पित बसले होते. त्यावेळी मंदार याने सोन्या खुळे याला शिवीगाळ केली. त्याचा राग मनात धरुन खुळे याने त्याच्या इतर साथीदारांना घटनास्थळी बोलावले. खुळे व राजू कोतवाल यांनी धारदार हत्याराने व साहिल इजगल व चेतन बनसोडे यांनी मंदार याला लाथाबुक्क्यांनी मारहाण केली. त्यात मंदार याचा मृत्यू झाला.
ही घटना सिंहगड रोडवरील सई हेरिटेज सोसायटीचे मंदिराजवळ पहाटे एक वाजण्याच्या सुमारास घडली. याप्रकरणी शुभम दत्ता अडसुळ (वय २३, रा. अप्पर इंदिरानगर) यांनी दत्तवाडी पोलिसांकडे फिर्याद दिली आहे.पोलिसांनी सोन्या खुळे, राजू कोतवाल, इजगद, चेतन बनसोडे (रा. सर्व दत्तवाडी) यांच्याविरुद्ध गुन्हा दाखल करुन तिघांना ताब्यात घेतले आहे. सहायक पोलीस निरीक्षक युवराज पाटील तपास करीत आहेत.
