नवी मुंबई (प्रतिनिधी विरेंद्र म्हात्रे) : भीक मागण्याच्या बहाण्याने ऐरोली सेक्टर-३ मधील प्रकाश सहकारी पतसंस्थेमध्ये गेलेल्या तीन महिलांनी गोंधळ घालून पतसंस्थेतील तब्बल पावणे दोन लाख रुपयांची रोख रक्कम चोरून नेल्याची घटना उघडकीस आली आहे. रबाळे पोलिसांनी या महिलांविरोधात गुन्हा दाखल करून त्यांचा शोध सुरू केला आहे.
ऐरोली सेक्टर-३मध्ये प्रकाश सहकारी पतसंस्थेचे कार्यालय असून संतोष पवार या पतसंस्थेचे व्यवस्थापक आहेत. २९ नोव्हेंबर रोजी दुपारी सव्वा बारा वाजण्याच्या सुमारास पवार यांनी बँकेत भरण्यासाठी दोन लाख ४१ हजार रुपयांचे एक बंडल व १ लाख ८४ हजार रुपयांचे दुसरे बंडल तयार केले होते. याचवेळी पतसंस्थेत तीन अनोळखी महिला एका लहान मुलासह भीक मागण्यासाठी गेल्या होत्या. यावेळी पवार यांनी रोख रकमेचे दोन्ही बंडल टेबलाच्या बॉक्समध्ये ठेवल्यानंतर पवार यांनी तिन्ही महिलांना बाहेर हाकलण्यास सुरुवात केली. मात्र या महिलांनी गोंधळ घालून पवार व लिपिक सचिन बोंबले या दोघांचे लक्ष विचलित केले. या गोंधळाच्या वेळी महिलांनी पतसंस्थेच्या टेबलामध्ये ठेवलेले १ लाख ८४ हजार रुपयांच्या रकमेचे बंडल चोरले.
पवार यांनी महिलांना भीक न दिल्याने तिन्ही महिला पतसंस्थेमधून निघून गेल्या. त्यानंतर पवार यांनी टेबलाच्या बॉक्समध्ये ठेवलेले रोख रकमेचे बंडल बाहेर काढले असता, त्यात केवळ एकच नोटांचे बंडल असल्याचे निदर्शनास आले. त्यामुळे त्यांनी व लिपिक बोंबले या दोघांना सगळीकडे शोधूनही ते बंडल सापडले नाही. त्यानंतर भीक मागण्याच्या बहाण्याने पतसंस्थेत आलेल्या तीन महिलांनीच पावणेदोन लाख रुपयांची रक्कम चोरून नेल्याचे त्यांच्या लक्षात आले. त्यानंतर त्यांनी या महिलांचा शोध घेण्याचा प्रयत्न केला. मात्र त्या न सापडल्याने पतसंस्थेचे व्यवस्थापक संतोष पवार यांनी बुधवारी रबाळे पोलिस ठाणे गाठून तक्रार दाखल केली. या तक्रारीवरून पोलिसांनी तीन अज्ञात महिलांविरोधात चोरीचा गुन्हा दाखल करून त्यांचा शोध सुरू केला आहे.
