नवी मुंबई (प्रतिनिधी विरेंद्र म्हात्रे) : महापे एमआयडीसीतील सरल डिझाइन प्रा. लि. कंपनीत घरफोडी करून तब्बल १४ लाख ६३ हजार रुपये किंमतीचा ऐवज चोरणाऱ्या तीन सराईत चोरट्यांना तुर्भे एमआयडीसी पोलिसांनी ७२ तासांच्या आत अटक केली. तसेच त्यांनी चोरलेला संपूर्ण मुद्देमालही हस्तगत केला आहे. या कारवाईत पोलिसांनी चोरीचा माल विकत घेणाऱ्या व्यक्तीला देखील अटक केली आहे.
या कारवाईत अटक करण्यात आलेल्यामध्ये सलमान युसूफ शेख (२८), महेंद्र अविनाश पाटील उर्फ मोट्या (२६), चंदनकुमार विजयकुमार सिंग (२१), तसेच चोरीचा माल विकत घेणारा निसार अहमद अब्दुल रौफ खान (३०) या चौघांचा समावेश आहे. यातील सलमान, महेंद्र व चंदन या तिघांनी ३० नोव्हेंबरला पहाटेच्या सुमारास महापे एमआयडीसीतील सरल डिझाइन प्रा. लि. या कंपनीचे शटर तोडत त्यातील वेगवेगळ्या मशिनचे पार्ट, लॅपटॉप, मॉनिटर असा तब्बल १४ लाख ६३ हजार रुपये किंमतीचा ऐवज चोरून नेला होता.
याबाबत तुर्भे एमआयडीसी पोलिस ठाण्यात घरफोडीचा गुन्हा दाखल झाल्यानंतर तपासाला सुरुवात झाली. या तपासादरम्यान पोलिसांच्या पथकाने या गुन्ह्यातील चोरांची माहिती मिळविली. त्यानंतर पोलिसांनी तळोजा व महापे परिसरात दिवस-रात्र पाळत ठेवून या गुन्ह्यातील आरोपी सलमान शेख, महेंद्र पाटील आणि चंदनकुमार सिंग या तिघांना अटक केली. आरोपींनी चोरी केलेला काही माल तुर्भे येथील भंगार विक्रेत्याला विकल्याची माहिती त्यांच्या चौकशीतून मिळाल्यानंतर पोलिसांनी चोरीचा माल विकत घेणारा तुर्भे येथील भंगार विक्रेता निसार खान याला अटक करून त्याच्याकडून चोरीचा मुद्देमाल हस्तगत केला आहे. तसेच आरोपींनी या गुह्यात वापरलेला दीड लाख रुपये किंमतीचा टेम्पो जप्त केला.
