ठाणे (उपसंपादक सतीश बनसोडे) – बॉलिवूडमधील प्रसिद्ध कोरिओग्राफर रेमो डिसूझा आणि त्याची पत्नी लिझल यांच्या अडचणीत वाढ होण्याची शक्यता आहे. उत्तर प्रदेशमधील एका व्यावसायिकाने आर्थिक फसवणुकीची तक्रार दाखल केल्यानंतर रेमो आणि त्याची पत्नी चर्चेत आली होते. या प्रकरणी गाझियाबादच्या सिहानी गेट पोलिसांनी आरोपपत्र सादर केलं आहे.
‘रेमोने अमर मस्ट डाय या चित्रपटाच्या निर्मितीसाठी माझ्याकडून पाच कोटी रुपये घेतले आणि चित्रपट प्रदर्शनानंतर पैसे दुपटीने परत करण्याची ग्वाही दिली होती. मात्र, प्रत्यक्षात त्यानं नंतर पैसे परत करण्यास नकार देऊन माझी फसवणूक केली. इतकंच नव्हे तर पैसे परत मागू नये म्हणून त्यानं मला गुंडांकरवी धमकावलं’, अशी तक्रार सत्येंद्र त्यागी यांनी २०१६मध्ये सिहानी गेट पोलिस ठाण्यात नोंदवली. याप्रकरणी न्यायालयानं वारंवार समन्स बजावूनही रेमो हजर न झाल्यानं २३ ऑक्टोबर २०१९ रोजी त्याच्याविरोधात अजामीनपात्र अटक वॉरंट बजावलं होतं. त्यामुळं अटकेच्या भीतीने रेमोनं तातडीनं मुंबई उच्च न्यायालयात धाव घेतली होती.
रेमोच्या अर्जावर दिवाळी सुटीकालीन न्यायालयाचे न्यायमूर्ती के. के. तातेड यांच्यासमोर वर्षभरापूर्वी सुनावणी झाली होती. तेव्हा, ‘वॉरंटच्या अंमलबजावणीचा विषय गाझियाबादमधील पोलिसांकडून अद्याप अंधेरीतील अंबोली पोलिस ठाण्यापर्यंत आलेला नाही. त्यामुळे रेमोविरोधात कारवाई करण्याचा प्रश्न सध्या उद्भवत नाही’, अशी माहिती अतिरिक्त सरकारी वकील जयेश याज्ञिक यांनी दिली होती. त्यामुळं अर्जाची सध्या दखल घेण्याचे कोणतेही कारण नाही, असं निरीक्षण नोंदवून न्यायमूर्तींनी रेमोचा अर्ज फेटाळून लावला होता.
