ठाणे (उपसंपादक सतीश बनसोडे) – नाशिक जिल्ह्यातील चांदवडजवळ मुंबई- आग्रा महामार्गावर चालत्या गाडीला आग लागल्याची धक्कादायक घटना घडली आहे. ही आग अधिक भडकल्यानं राष्ट्रवादी काँग्रेसचे नेते संजय शिंदे यांचा कारमध्ये होरपळून मृत्यू झाला आहे. हँड सॅनिटायझरमुळं ही आग अधिक भडकल्यानं हा अपघात घडल्याची शक्यता वर्तवण्यात येत आहे.
संजय शिंदे हे त्यांच्या कारमधून नाशिककडे जात असताना चांदवडजवळ धावत्या कारनं पेट घेतला. शॉर्ट सर्किट झाल्यानं ही आग लागल्याचं सांगितलं जातंय. त्यातच गाडीत असलेल्या सॅनिटायझरमुळं ही आग अधिक पसरली. ज्यावेळेस ही घटना घडली तेव्हा संजय शिंदे यांनी गाडीतून बाहेर पडण्यासाठी गाडीचा दरवाजा व खिडकी तोडण्याचा प्रयत्न केला मात्र, कारचं सेंट्रल लॉक लागल्यानं ते दरवाजा उघडू शकले नाही आणि कारमध्येच होरपळून त्यांचा मृत्यू झाला.
संजय शिंदे हे नाशिकमधील प्रसिद्ध द्राक्षे निर्यातदार होते. पोलिसांनी दिलेल्या माहितीनुसार, ही घटना मंगळवारी घडली आहे. शिंदे किटकनाशके खरेदी करण्यासाठी पिंपळगाव येथे जात असताना त्यांच्या चालत्या गाडीने अचानक पेट घेतला, अशी माहिती पोलिसांनी दिली आहे. कारनं पेट घेताच स्थानिक रहिवाशांनी संजय शिंदे यांना कारमधून बाहेर काढण्यासाठी प्रयत्न केले मात्र, तोपर्यंत उशीर झाला होता.
