कोटा – अनैतिक संबंधांमुळं राजस्थानमधील बारा येथील एक कुटुंब उद्ध्वस्त झालंय. पत्नीनं प्रियकराच्या मदतीनं आपल्या पतीची हत्या केली. पोलिसांनी पत्नीसह तिच्या प्रियकरालाही अटक केली आहे. या घटनेमुळं परिसरातील लोक हादरले आहेत.
बारा जिल्ह्याचे पोलीस अधीक्षक डॉ. रवी सभरवाल यांनी सांगितले की, २९ नोव्हेंबरला तक्रारदार भरत यांनी यासंबंधी तक्रार दाखल केली होती. त्यानुसार, २१ नोव्हेंबरला त्याचा भाऊ महेंद्र हा पत्नीसोबत वीट भट्टीचा कामगार कंत्राटदार राकेश मेघवाल याच्यासोबत रात्री कामासाठी गेला होता. पती आणि पत्नीमध्ये भांडण झाले. त्यावेळी राकेश हा तिथे होता. त्यानंतर भाऊ बेपत्ता झाला आहे. आम्ही सगळे महेंद्रचा शोध घेत आहेत, असे त्याने म्हटले आहे. २९ नोव्हेंबरला दहा ते अकरा जण महेंद्र याचा शोध घेण्यासाठी वीट भट्टीकडे गेले. तेव्हा रस्त्याच्या बाजूला दुर्गंधी येत होती. याबाबत त्यांनी पोलिसांना कळवले. पोलिसांनी घटनास्थळी येऊन पाहणी केली असता, महेंद्रचा मृतदेह आढळून आला.
या घटनेनंतर पोलिसांनी महेंद्रची पत्नी आणि राकेशची कसून चौकशी केली. त्यावर त्यांनी हत्येची कबुली दिली. महेंद्रच्या भावाने तक्रार केल्यानंतर अतिरिक्त पोलीस अधीक्षक विजय स्वर्णकार यांच्या आदेशान्वये महावीर प्रसाद यांच्या नेतृत्वाखाली एका विशेष पथकाची स्थापना केली. त्यांनी या घटनेचा विविध बाजूने तपास केला. त्यानंतर राकेश आणि महेंद्रच्या पत्नीच्या अनैतिक संबंधांबाबत माहिती मिळाली. पोलिसांनी दोघांना ताब्यात घेऊन कसून चौकशी केली असता, त्यांनी हत्येची कबुली दिली.
