नवी दिल्ली- लक्षद्वीपचे प्रशासक दिनेश्वर शर्मा यांचे फुफ्फुसाशी संबंधित आजाराने शुक्रवारी निधन झाले. ते ६६ वर्षांचे होते. गुप्तचर संस्था आयबीचे माजी संचालक दिनेश्वर शर्मा यांना ऑक्टोबर २०१९ मध्ये लक्षद्वीपच्या प्रशासक नियुक्त करण्यात आले होते. त्यापूर्वी ते जम्मू आणि काश्मीरसाठी केंद्राचे वार्ताकार होते. शर्मा हे १९७६ च्या बॅचचे आयपीएस अधिकारी होते. ते केरळ केडरशी संबंधित होते. त्यांच्या निधनावर राष्ट्रपती रामनाथ कोविंद, पंतप्रधान नरेंद्र मोदी आणि केंद्रीय गृहमंत्री अमित शहा यांनी शोक व्यक्त केला आहे.
पंतप्रधान नरेंद्र मोदी यांनी दिनेश्वर शर्मा यांच्या निधनानंतर ट्विट केले आहे. लक्षद्वीपचे प्रशासक दिनेश्वर शर्मा यांनी भारताच्या पोलिस प्रणाली आणि सुरक्षा यंत्रणांमध्ये दीर्घकाळ योगदान दिले आहे. त्यांनी आपल्या कारकीर्दित दहशतवादाविरोधात अनेक संवेदनशील अभियानांमध्ये योगदान दिले आहे. त्यांच्या निधनान मी दु:खी आहे. मी त्यांच्या कुटुंबाच्या दु:खात सहभागी आहे, असे पंतप्रधानांनी म्हटले आहे.
लक्षद्वीपचे प्रशासक दिनेश्वर शर्मा यांच्या निधनाने आपण दु:खी असल्याचे केंद्री गृहमंत्री अमित शहा यांनी ट्विटद्वारे म्हटले आहे. लक्षद्वीपचे प्रशासक दिनेश्वर शर्मा यांच्या निधनाने आपण अतिशय दु:खी झालो आहोत. त्यांनी भारतीय पोलिस सेवेतील समर्पित अधिकारी म्हणून अत्यंत समर्पणासह राष्ट्राची सेवा केली. दु:खाच्या या प्रसंगी आपण त्यांच्या कुटुंबीयांसोबत असल्याचे केंद्रीय गृहमंत्र्यांनी म्हटले आहे.
लक्षद्वीपचे प्रशासक दिनेश्वर शर्मा यांचे निधन स्तब्ध करणारे आहे, असे राष्ट्रपती रामनाथ कोविंद यांनी म्हटले आहे. ते एक उत्तम पोलिस अधिकारी होते. ते अंतर्गत सुरक्षा व्यवस्थेतील विशेषज्ञ होते. त्यांच्या कुटुंबाच्या आणि मित्रांच्या दु:खात मी सहभागी आहे, असे राष्ट्रपती कोविंद यांनी ट्विट करत म्हटले आहे.
