वर्धा (प्रतिनिधी मनोज बाचले) – आपले कर्तव्य बजावत असलेल्या वाहतूक पोलिसाला मारहाण करणाऱ्यावर कोतवाली पोलिसांनी गुन्हा दाखल केला आहे. प्रकाशचंद्र मिश्रा (वय ४४) असे या प्रकरणातील फिर्यादीचे तर विक्रांत हरीश वासानी (वय २२, रा. कृष्णकुंज अपार्टमेंन्ट) असे आरोपीचे नाव आहे.
मिश्रा हे सैन्य दलातून निवृत्त झालेत. त्यानंतर दोन वर्षांपूर्वी ते पोलीस विभागात रूजू झाले. आरोपी वासानी याने त्याच्या ‘बुलेट’च्या ‘सायलेन्सर’मध्ये काही बदल केलेत. यामुळे त्याच्या गाडीतून कर्णकर्क्कश आवाज येत होता. मिश्रा हे गीतांजली चौकात आपल्या कर्तव्यावर हजर होते. त्यांनी वासानीला अडवून त्याच्यावर कारवाई करण्यास सुरुवात केली. वासानीने त्यांना शिवीगाळ केली. तसेच मारहाणही केली. या प्रकरणी मिश्रांनी दिलेल्या तक्रारीच्या आधारावर पोलिसांनी वासानीवर सरकारी कामात अडथळा आणणे या आरोपाखाली गुन्हा दाखल केला आहे.
