पुणे (प्रतिनिधी सुनिल भोसले) – ‘नो पार्किंग’मध्ये वाहने उभारणाऱ्यांवर कारवाई करताना तरुणांनी महिला वाहतूक पोलिसाला आणि वाहने उचलणाऱ्या कामगारांना शिवीगाळ करून दगडांनी मारहाण केली. हा प्रकार बुधवारी दुपारी विश्रांतवाडी परिसरात घडला. जमावाच्या मारहाणीत दोन कामगार जखमी झाले आहेत.
पोलिस नाईक वंदना आल्हाट (वय ४२) यांनी या प्रकरणी विश्रांतवाडी पोलिस ठाण्यात फिर्याद दिली आहे. तरुणांच्या मारहाणीत संतोष रायकर आणि लखन शेंडगे जखमी झाले आहेत. पोलिसांनी सहा अज्ञात तरुणांविरोधात सरकारी कामात अडथळा आणणे, जमाव जमवून मारहाण केल्याचा गुन्हा दाखल केला आहे.
पोलिसांनी दिलेल्या माहितीनुसार, फिर्यादी आल्हाट या येरवडा वाहतूक विभागात नेमणुकीला आहेत. बुधवारी दुपारी त्या ‘नो पार्किंग’मधील चारचाकी वाहनांवर कारवाई करण्यासाठी गेल्या होत्या. ऑरबिट मॉलसमोर कारवाई करताना दुचाकीवर आलेल्या तीन तरुणांनी त्यांच्याशी वाद घातला. या वेळी कर्मचाऱ्यांना शिवीगाळ करून ते निघून गेले. काही वेळाने तीन तरुण आणखी तिघांना घेऊन तेथे आले. त्यांनी आल्हाट यांच्यासह कामगारांना धक्काबुक्की करून दगडांनी मारहाण केली.
या तरुणांवर गुन्हा दाखल होऊ नये, यासाठी स्थानिक लोकप्रतिनिधींनी पोलिस ठाण्यात धाव घेतली होती. मात्र, पोलिस गुन्हा दाखल करण्यावर ठाम असल्याने त्यांची निराशा झाली; तसेच शांतीनगर भागातील महिलांनीही मोठ्या संख्यने विश्रांतवाडी पोलिस ठाणे आणि येरवडा वाहतूक विभागासमोर गर्दी केली होती.
