औरंगाबाद (प्रतिनिधी) – सिझेरियन शस्त्रक्रियेनंतर गरोदर महिलेचे निधन झाल्याच्या प्रकरणात वैद्यकीय अधीक्षकांच्या अहवालानंतर सिटीचौक पोलिस ठाण्यात दोन डॉक्टरांविरुद्ध गुन्हा दाखल करण्यात आला. हा प्रकार सुमारे दोन वर्षांपूर्वी घडला होता. डॉ. तहेजीब खान आणि डॉ. खुर्रम खान, अशी गुन्हा दाखल झालेल्या डॉक्टरांची नावे आहेत.
सिटीचौक पोलिसांनी दिलेल्या माहितीनुसार, एका २४ वर्षीय गरोदर महिलेला (रा. पठाणपुरा, जालना ह.मु. लेबर कॉलनी) १० फेब्रुवारी २०१८ रोजी जुना बाजारातील रुग्णालयात दाखल केले होते. येथे डॉ. तहेजीब खान आणि डॉ. खुर्रम खान यांनी महिलेवर उपचार सुरू केले. ११ फेब्रुवारी रोजी तिच्यावर सिझेरियन शस्त्रक्रिया करण्यात आली. त्यानंतर रक्तस्त्राव बंद होत नसल्याने २२ तासानंतर तिला घाटी रुग्णालयात दाखल केले होते. उपचारादरम्यान तिचा मृत्यू झाला. या प्रकरणात सिटीचौक पोलिस ठाण्यात आकस्मिक मृत्युची नोंद करण्यात आली. कुटुंबाने डॉक्टरांवर हलगर्जीपणाचा आरोप केला होता. त्यामुळे पोलिसांनी वैद्यकीय अधीक्षक कार्यालयाकडून अभिप्राय मागवला होता. या अहवालात दोन्ही डॉक्टरांनी हलगर्जीपणा केले स्पष्ट झाले आहे. त्यामुळे पोलिस अंमलदार अप्पासाहेब पाडुरंग देशमुख यांच्या फिर्यादीवरून दोन डॉक्टरच्या विरुदध गुन्हा दाखल करण्यात आला.
सिझेरियन शस्रक्रियेच्या २२ तासांनंतर तिला घाटी रुग्णालयात दाखल केले त्यावेळी तिची रक्त गोठण्याची प्रक्रिया बिघडली होती. ‘इकिमोसिक’ तयार झाले. ही प्रक्रिया शस्रक्रियेनंतर झाल्याचे दिसते. तीन वेळा रक्तस्राव होत असताना पट्टी केली त्यामुळे पेशंटची परिस्थिती अजून गंभीर झाली. शस्त्रक्रियेनंतर पट्टीतून रक्तस्राव होत असेल तर पुन्हा शस्रक्रिया करणे आवश्यक होते. या पेशंटसंदर्भात हे उपचार झाल्याचे दिसत नसल्याचे अहवालात नमुद असल्याची माहिती पोलिसांनी दिली.
