ठाणे (उपसंपादक सतीश बनसोडे) – आपल्या सख्ख्या अल्पवयीन पुतणीवर बलात्कार करणाऱ्या नराधम काकाला बुधवारी ठाणे न्यायालयाने १० वर्षे तुरुंगवासाची शिक्षा ठोठावली. ही मुलगी इयत्ता नववीमध्ये शिक्षण घेत असताना तिच्यावर लैंगिक अत्याचाराचा हा प्रकार घडला होता.
आरोपीने मुलीला दहाव्या मजल्यावरून फेकून देण्याची, तसेच बदनामी करण्याची धमकी देऊन मुंब्रा येथील हॉटेलमध्ये आणि माथेरानमधील एका चाळीतील खोलीमध्ये तिच्यावर अत्याचार केले. काकाकडून होत असलेल्या अत्याचारांबद्दल पीडितेने आईला सांगितले. तिच्या तक्रारीनंतर काकाविरुद्ध राबोडी पोलिस ठाण्यात गुन्हा दाखल करण्यात आला होता.
पोलिसांनी आरोपीला तत्काळ अटक केले. तसेच चौकशी करून न्यायालयात आरोपपत्र दाखल केले. बुधवारी या प्रकरणाचा ठाणे न्यायालयात निकाल लागला. न्यायालयाने आरोपीला दहा वर्षांचा कारावास आणि २२ हजार रुपये दंडाची शिक्षा ठोठावली असल्याचे सरकारी वकील उज्वला मोहोळकर यांनी सांगितले.
