बेंगळुरू (कर्नाटक) – राज्यातील चिकमंगळूर येथे धक्कादायक घटना उघडकीस आली आहे. १५ वर्षीय मुलीवर १७ जणांनी सलग पाचहून अधिक महिने बलात्कार केला. पोलिसांनी बलात्कार, लैंगिक शोषण आणि मानवी तस्करीप्रकरणी आठ जणांना अटक केली आहे. आरोपींमध्ये मुलीची मावशीदेखील आहे.
चिकमंगळूरच्या शृंगेरी पोलीस ठाण्यात ३० जानेवारी रोजी या प्रकरणी एफआयआर दाखल करण्यात आला. जिल्हा बालकल्याण समितीच्या सभापतींनी ही तक्रार केली होती. त्यात १५ वर्षीय मुलीवर १७ जणांनी बलात्कार केल्याचा आरोप केला आहे.
अतिरिक्त पोलीस अधीक्षकांनी सांगितले की, १५ वर्षीय मुलीवर १७ जणांनी पाच महिने बलात्कार आणि तिचा लैंगिक छळ केला आहे. या प्रकरणात तिची मावशी मुख्य आरोपी आहे. पीडित मुलगी ही खडी निर्मितीच्या युनिटमध्ये काम करत होती. तिथे बसचालक गिरीश याच्याशी तिची ओळख झाली. त्याने तिच्यावर बलात्कार केला. त्याने अभी नावाच्या मुलाला तिचा मोबाइल क्रमांक दिला. त्यानेही तिच्यावर बलात्कार केला. त्याने फोटो आणि व्हिडिओही काढला. त्यानंतर तिला ब्लॅकमेल केले. त्यानंतर त्याच्या इतर मित्रांनीही तिच्यावर बलात्कार केला, अशी माहितीही पोलिसांनी दिली.
तीन वर्षांपूर्वी पीडितेच्या आईचे निधन झाले. त्यानंतर ती आपल्या मावशीकडे राहत होती. या प्रकरणात तिच्या मावशीलाही अटक केली आहे. कारण पीडितेवर लैंगिक अत्याचार होत असल्याची माहिती तिच्या मावशीला होती. अभी, गिरीश, विकास, मनीकांता, संपथ, अश्वतगौडा, राजेश, अमित, संतोष, दिक्षित, संतोष, निरंजन, नारायण गौडा, अभी गौडा, योगेश, मुलीची मावशी आणि अन्य एकाचा समावेश आहे. त्यांच्याविरोधात गुन्हा दाखल करण्यात आला आहे. त्यापैकी आठ जणांना अटक करण्यात आली आहे.
