कन्नड (प्रतिनिधी) – तालुक्यातील आंबा तांडा येथील उच्च विद्यालयात शिकणाऱ्या अल्पवयीन मुलीचा दोन शिक्षकांनीच विनयभंग केल्याची घटना शुक्रवारी सकाळी घडली आहे. या प्रकरणी कन्नड ग्रामीण पोलिस ठाण्यात सायंकाळी विनयभंगाचा गुन्हा दाखल करण्यात आला आहे.
आंबा तांडा येथील नवजीवन माध्यमिक व रूपा नाईक उच्च माध्यमिक विद्यालयात वर्गशिक्षकाने तीन मुलींना प्रयोगशाळा रूम साफसफाई करण्यास सांगितले होते. सोबतच्या दोन मुली झाडू आणण्यासाठी गेल्या होत्या. पिडीत मुलगी एकटीच आहे, असे बघून त्याच विद्यालयात शिकवणारे शिक्षक संदीप शिखरे व अनुप राठोड या दोघांनी लग्नाचे अमिष दाखवत विद्यार्थिनीचा विनयभंग केला.
पीडित विद्यार्थिनीने ही घटना वर्गशिक्षकांना सांगितली व दुपारी वडिलांना फोन करून सांगितली. शुक्रवारी सायंकाळी पिडीता व आईवडील यांनी कन्नड पोलिस ठाणे गाठले. त्यानंतर दोघां शिक्षकांविरुद्ध गुन्हा दाखल करण्यात आला आहे. या प्रकरणी पोलिस निरीक्षक सुनील नेवसे यांच्या मार्गदर्शनाखाली पोलिस उपनिरीक्षक प्रदीप भिवसने पुढील तपास करीत आहेत.
