स्वातंत्र्योत्तर काळात फाशीची शिक्षा होणारी पहिलीच महिला
मथुरा (उत्तर प्रदेश) – स्वतंत्र भारताच्या इतिहासात पहिल्यांदाच एका महिला आरोपीला फाशी देण्यात येणार आहे. उत्तर प्रदेशच्या मथुरा तुरुंगात महिलांना फाशी देण्यासाठी व्यवस्था करण्यात आली आहे. फाशीच्या शिक्षेची अंमलबजावणी करण्यासाठी तुरुंगात तयारी सुरू करण्यात आली आहे. शबनम नावाच्या महिला आरोपीला फाशी दिली जाऊ शकते. मात्र, तुरुंग अधीक्षकांनी फाशीच्या अंमलबजावणीबाबत माहिती दिली नाही.
महिलांना फाशी देण्यासाठी उत्तर प्रदेशातील हे एकमेव तुरुंग आहे. देश स्वतंत्र झाल्यानंतर या तुरुंगात एकाही महिला कैद्याला फाशीची शिक्षा दिलेली नाही. मथुरा तुरुंगात १८७० मध्ये फाशीघर तयार करण्यात आले होते. मात्र, तुरुंगातील नोंदीनुसार, देश स्वतंत्र झाल्यानंतर या फाशीघरात एकाही कैद्याला फाशी देण्यात आलेली नाही. मथुरा तुरुंगातील या फाशीघराच्या दुरुस्तीचे काम आता सुरू झाले आहे.
फाशीघराची डागडुजी करण्यासाठी तुरुंग अधीक्षकांनी वरिष्ठ अधिकाऱ्यांशी पत्रव्यवहार केला आहे. एनबीटी ऑनलाइनशी बोलताना तुरुंग अधीक्षक शैलेंद्र कुमार मैत्रेय यांनी सांगितले की, शबनमला फाशी देण्यासंबंधी आमच्याकडे सध्यातरी कोणतीही माहिती नाही. फाशीघर खूपच जीर्ण झाले होते. त्याच्या डागडुजीसाठी पत्रव्यवहार केला आहे. दोरखंडाचीही मागणी केली आहे.
शबनम ही उत्तर प्रदेशातील अमरोहा येथील रहिवासी आहे. मथुरा तुरुंगात तिला फाशी दिली जाऊ शकते, असे सांगण्यात येत आहे. शबनमने आपल्या प्रियकराच्या मदतीने १५ एप्रिल २००८ रोजी आपल्या कुटुंबातील सात जणांची निर्घृण हत्या केली होती. त्यात तिचे आईवडील, दोन भाऊ, वहिनी, मावशीची मुलगी आणि पुतण्याचा समावेश होता.
या प्रकरणात अमरोहा कोर्टात दोन वर्षे तीन महिने सुनावणी सुरू होती. त्यानंतर १५ जुलै २०१० रोजी कोर्टाने शबनम आणि सलीमला फाशीची शिक्षा सुनावली होती. कोर्टाने दिलेल्या निर्णयाला दोषी शबनमने सुप्रीम कोर्टात आव्हान दिले होते. सुप्रीम कोर्टानेही कोर्टाचा निर्णय कायम ठेवला होता. त्यानंतर शबनम आणि सलीमने राष्ट्रपतींकडे दयेची याचिका केली होती. मात्र, राष्ट्रपतींनीही दया याचिका फेटाळून लावली होती. त्यामुळे देश स्वतंत्र झाल्यानंतर पहिल्यांदाच एखाद्या महिला आरोपीला फाशी होणार आहे. देशात एकमेव मथुरा तुरुंगात महिला आरोपींना फाशी देण्याची व्यवस्था आहे. तिथे शबनमला फाशी दिली जाऊ शकते. ती सध्या बरेली तुरुंगात कैद असून, तिचा प्रियकर सलीम हा आग्रा तुरुंगात आहे.
