कोलकाता – पश्चिम बंगालमध्ये विधानसभा निवडणुकांचे वातावरण तापले असून, भाजप आणि तृणमूल काँग्रेसमध्ये हिंसक घटनांवरून आरोप-प्रत्यारोप सुरूच आहेत. आता राज्यातील नादिया जिल्ह्यात भाजपच्या स्थानिक नेत्यावर गोळ्या झाडल्याची घटना घडली आहे. हरिंगाटा परिसरात ३२ वर्षीय स्थानिक भाजप नेत्यावर गोळीबार केला. यात तो जखमी झाला आहे. भाजपच्या कार्यकर्त्यांनी या घटनेनंतर तृणमूल काँग्रेसच्या कार्यकर्त्यांवर आरोप केला आहे.
गस्ती घालत असताना पोलीस कर्मचाऱ्यांना संजय दास हा कपिलेश्वर संतोषपूर येथील एका चहाच्या टपरीजवळ जखमी अवस्थेत दिसला. त्यांनी तातडीने त्याला रुग्णालयात दाखल केले. हरिंगटा नगरपालिकेच्या वॉर्ड क्रमांक १०मधील भाजप बूथ अध्यक्ष संजय दास याच्यावर गोळ्या झाडल्या होत्या. यात तो जखमी झाला आहे. आता त्याची प्रकृती ठीक आहे.
या हल्ल्यामागे तृणमूल काँग्रेसचे कार्यकर्ते असल्याचा आरोप भाजपने केला आहे. मात्र, तृणमूलच्या कार्यकर्त्यांनी आरोप फेटाळले आहेत. दोन गटांमध्ये झालेल्या वादातून हा हल्ला झाला आहे, ते भाजपशी संबंधित असल्याचे तृणमूलचे म्हणणे आहे. पोलीस अधिक्षकांनी सांगितले की, पोलीस कर्मचारी गस्तीवर होते.
रविवारी मध्यरात्री अडीच वाजताच्या सुमारास राष्ट्रीय महामार्ग १२ जवळील एका चहाच्या टपरीजवळ त्यांनी वाहन थांबवले. तेथूनच थोड्या अंतरावर काही जण बसलेले होते. पोलीस कर्मचारी तिथे पोहोचताच, त्या लोकांनी तेथून पळ काढला. एक व्यक्ती रक्ताच्या थारोळ्यात तिथे पडली होती. एका गटातील व्यक्तीने त्याच्यावर गोळ्या झाडल्याचे त्याने पोलिसांना सांगितले. संजय दासच्या वडिलांनी रविवारी संध्याकाळी पोलिसांत तक्रार दाखल केली आहे. राजकीय वादातून माझ्या मुलावर गोळ्या झाडल्याचे त्याच्या वडिलांनी तक्रारीत म्हटले आहे.
