अजमेर (राजस्थान) – येथे धक्कादायक आणि तितकीच संतापजनक घटना घडली आहे. तरुणाने पत्नीच्या लहान बहिणीवर बलात्कार केला. त्याआधी त्याने आपल्या पत्नीला चहा तयार करण्यासाठी स्वयंपाकघरात पाठवले आणि त्यानंतर हे घृणास्पद कृत्य केले. पत्नी चहा घेऊन बाहेर आली असता, पतीला तिच्या लहान बहिणीसोबत आक्षेपार्ह अवस्थेत बघून तिचा पारा चढला. तिने पतीला थप्पड लगावली. या प्रकरणी तिने अलवर गेट पोलीस ठाण्यात तक्रार दाखल केली.
अलवर गेट पोलिसांनी दिलेल्या माहितीनुसार, पोलीस ठाण्याच्या हद्दीत दोघी बहिणी शिक्षण घेत आहेत. मोठ्या बहिणीने तक्रारीत नमूद केले की, तिचे लग्न झाले आहे. तिची लहान बहीण तिच्यासोबत राहते. तिचा पती १७ फेब्रुवारीला एका लग्नसोहळ्याला गेला होता. तेथून तिच्यासोबत तो अजमेरला आला. जयपूर जाण्यापूर्वी त्याने पत्नीला चहा तयार करण्यासाठी स्वयंपाकघरात पाठवले. ती चहा बनवण्यासाठी गेली. त्याने संधी साधून पत्नीच्या लहान बहिणीवर बलात्कार केला. ती चहा घेऊन बाहेर आली असता, त्याला बहिणीसोबत आक्षेपार्ह अवस्थेत बघून तिला धक्का बसला. तिच्या रागाचा पारा चढला. तिने त्याच्या कानशिलात लगावली. त्यानंतर ते गावी गेले.
पोलीस सूत्रांच्या माहितीनुसार, या घटनेबद्दल कुटुंबीयांना काही सांगू नकोस, असे पीडितेने मोठ्या बहिणीला सांगितले. मात्र, तिने आपल्या वडिलांना या घटनेची माहिती दिली. त्यानंतर पीडितेला न्याय मिळवून देण्याचा निर्णय मोठ्या बहिणीने घेतला. तिने अजमेर गाठले आणि याबाबत पोलिसांत तक्रार दाखल केली. त्यानंतर पोलिसांनी गुन्हा दाखल केला आहे. पीडितेची वैद्यकीय तपासणी केली आहे. आरोपीचा शोध घेतला जात आहे. त्याला लवकरच अटक करण्यात येईल, असे पोलिसांनी सांगितले.
