पुणे (प्रतिनिधी सुनिल भोसले) – पतीपासून विभक्त राहणाऱ्या महिलेला पतीनेच ब्लॅकमेल करून जबरदस्ती शारीरिक संबंध ठेवण्यास भाग पाडून, पैशांची मागणी केल्याचा प्रकार उघडकीस आला आहे. तसेच, पतीने सोशल मीडियावर पत्नीचा अश्लील व्हिडिओदेखील प्रसारित केल्याचे समोर आले.
या प्रकरणी एका ३३ वर्षीय महिलेने (रा. ताडीवाला रस्ता) बंडगार्डन पोलिस ठाण्यात फिर्याद दिली आहे. त्यावरून तिच्या पतीवर गुन्हा दाखल करण्यात आला आहे. बंडगार्डन पोलिसांनी दिलेल्या माहितीनुसार, फिर्यादी महिलेचा पती दारू पिऊन तिला मारहाण करत असल्याने २०१५ पासून ती पतीपासून विभक्त राहते. सध्या ती ताडीवाला रस्ता येथे आपल्या आई-वडिलांसोबत राहत असून, शेजारी राहणाऱ्या एका तरुणाशी तिचे प्रेमसंबंध निर्माण झाले आहेत.
दरम्यान, आरोपीने महिला आणि तिच्या प्रियकराला सोबत पाहिल्याने त्याने महिलेला ब्लॅकमेल करून शरीरसंबंध ठेवण्याची मागणी केली. आरोपीने मार्च २०२० मध्ये जबरदस्तीने शारीरिक संबंध ठेवून तिचा अश्लील व्हिडिओ बनविला. त्यानंतर आरोपीने तो व्हिडिओ प्रसारित करण्याची भीती दाखवून ब्लॅकमेलिंग सुरू ठेवले होते. त्यानंतर आरोपीने महिलेच्या नावाने फेसबुकवर बनावट खाते उघडून त्यावर तो व्हिडिओ प्रसारित केला. त्यामुळे बंडगार्डन पोलिस ठाण्यात गुन्हा दाखल आहे.
