कोल्हापूर (जिल्हा प्रतिनिधी नियाज जमादार) – बेळगाव येथे कन्नड रक्षण वेदिके संघटनेने शिवसेना जिल्हाप्रमुख प्रकाश शिरोळकर यांच्यावर भ्याड हल्ला करत त्यांच्या गाडीवर असलेला भगवा ध्वज काढून टाकला. तसेच शिरोळकर व त्यांच्या गाडीवरील भगव्या फलकाला काळे फासण्याचा प्रयत्नही करण्यात आला. यामुळे सीमाभागातील मराठी बांधवांमध्ये संतापाची लाट उसळली आहे. दरम्यान, याला प्रत्युत्तर देत कोल्हापुरात शिवसेनेने कर्नाटकच्या बसेसना बंदी घातली आहे.
आज दुपारी प्रकाश शिरोळकर हे आपल्या सहकाऱ्यांसमवेत रामलिंगखिंड गल्लीतून बाहेर पडले. तेथे दबा धरून बसलेल्या कन्नड रक्षण वेदिकेच्या कार्यकर्त्यांनी त्यांच्या गाडीवर अचानक भ्याड हल्ला केला. त्यांच्या अंगावर धावून जाण्याचा प्रयत्न केला. यावेळी तेथे पोलीसही उपस्थित होते. पोलिसांच्या उपस्थितीत शिरोळकर यांच्या गाडीवरील भगवा ध्वज या काढून टाकण्यात आला. त्याला काळे फासण्याचाही प्रयत्न झाला. पंधरा ते वीस जण हे कृत्य करत असताना पोलिसांनी मात्र बघ्याची भूमिका घेतली.
शिरोळकर यांनी एकट्याने या सर्वांचा प्रतिकार केला. या घटनेने सीमाभागात संतापाची लाट उसळली आहे. या घटनेचे वृत्त कळताच शिवसेना व महाराष्ट्र एकीकरण समितीच्या कार्यकर्त्यांनी धर्मवीर संभाजी चौकात रास्ता रोको आंदोलन केले. पोलिसांनी या हल्लेखोरांना तातडीने अटक करावी अशी मागणी यावेळी करण्यात आली. त्यानंतर पोलिसांनी याबाबत फिर्याद देण्याची सूचना केल्यानंतर अधिकाऱ्यांनी घटनास्थळी येऊन पंचनामा करावा असा आग्रह कार्यकर्त्यांनी धरला. त्यानुसार अधिकाऱ्यांनी घटनास्थळी येऊन पंचनामा केला. बेळगावचे पोलीस उपायुक्त विक्रम आपटे यांनी या घटनेबाबत चौकशी करून गुन्हेगारांवर कारवाई करण्यात येईल असे आश्वासन दिल्यानंतर आंदोलन मागे घेण्यात आले.
बेळगाव मध्ये घडलेल्या या घटनेचे पडसाद सायंकाळी कोल्हापुरात उमटले. कोल्हापुरातील शिवसेनेच्या कार्यकर्त्यांनी मध्यवर्ती बस स्थानक येथे जाऊन कर्नाटकच्या बसेसना बंदी घातली. यावेळी कन्नड रक्षण वेदिकेच्या विरोधात जोरदार घोषणाबाजी करण्यात आली. मराठी बांधवावर कर्नाटक सरकार सतत अन्याय करत असल्याचा यावेळी निषेध करण्यात आला.
शिरोळकर हे उपमहापौर असताना याच कन्नड रक्षण वेदिकेच्या कार्यकर्त्यांनी त्यांच्यावर हल्ला केला होता. चार दिवसांपूर्वी महाराष्ट्र एकीकरण समिती व शिवसेनेने महापालिकेवर मोर्चा काढला होता. महापालिकेवरील भगवा ध्वज काढून तेथे कन्नड रक्षण वेदिके संघटनेने लाल पिवळा ध्वज लावला होता. तो ध्वज काढण्यासाठी हा मोर्चा काढला होता. तेव्हापासून वाद धुमसत होता. त्याला प्रत्युत्तर म्हणून संघटनेने आज शिरोळकर यांच्यावर हल्ला केला. या हल्ल्याचा सीमाभागात तीव्र निषेध व्यक्त केला जात असून संघटनेच्या या कार्यकर्त्यावर कारवाई करावी अशी मागणी होत आहे.
