पुणे (प्रतिनिधी सुनिल भोसले) – रामबाग कॉलनीतील एका सोसायटी बाहेर रसवंती चालविणाऱ्या महिलेला मारहाण केल्याच्या आरोपावरून माजी आमदार मेधा कुलकर्णी यांच्यासह चौघांवर कोथरूड पोलिस ठाण्यात अदखलपात्र गुन्ह्याची नोंद करण्यात आली आहे.
याबाबत मनीषा संतोष भोसले (वय ३०, रा. रामबाग कॉलनी) यांनी तक्रार दिली आहे. त्यानुसार माजी आमदार मेधा कुलकर्णी यांच्यासह, अनिता तलाठी व इतर दोघांच्या विरोधात मारहाण, धमकावणे अशा कलमांनुसार अदखलपात्र गुन्हा दाखल करण्यात आला आहे, अशी माहिती कोथरूड पोलिस ठाण्याचे वरिष्ठ निरीक्षक मेघश्याम डांगे यांनी दिली.
गणेशकुंज सोसायटीबाहेर मनीषा भोसले फिरत्या रसवंती गृहाची गाडी लावत होत्या. या सोसायटीतील रहिवाशी जयेश कुलकर्णी यांचा १७ फेब्रुवारी रोजी भोसले यांच्यासोबत वाद झाला होता. त्या वेळी त्यांना कुलकर्णी यांनी मारहाण केली. या प्रकरणीही त्याच्या विरोधात गुन्हा दाखल करण्यात आला होता. मारहाण झाल्यामुळे भोसले यांचा गर्भपात झाल्याचे ससूनमध्ये उपचार घेताना समजले होते. तरीही त्यांनी वाद नको म्हणून दुर्लक्ष केले होते. त्यानंतर शुक्रवारी पुन्हा जयेश कुलकर्णी व भोसले यांच्यात रसवंतीची गाडी लावण्यावरून वाद झाले होते. या वेळी मेधा कुलकर्णी व त्यांच्यासोबत असणाऱ्यांनी मारहाण केल्याची तक्रार भोसले यांनी पोलिसांकडे दिली होती.
