नवी दिल्ली – केंद्रीय राखीव पोलीस दलानं बुधवारी आपले मुख्य खेळ अधिकारी उप महानिरीक्षक खजान सिंह आणि कोच निरीक्षक सुरजीत सिंह यांना निलंबित केलंय. महिला कॉन्स्टेबल बलात्कार प्रकरणात प्राथमिक चौकशीत हे दोन्ही अधिकारी दोषी आढळले होते. उल्लेखनीय म्हणजे, देशातील सर्वात मोठ्या अर्धसैनिक दलाचे मुख्य खेळ अधिकारी आणि आरोपी खजान सिंह यांनी १९८६ मध्ये आशियाई खेळांत रजत पदक पटकावलं होतं. याशिवाय त्यांना अर्जुन पुरस्कारानंही सन्मानित करण्यात आलं होतं. ‘आपल्यावर करण्यात आलेले आरोप खोटे असून प्रतिमा मलिन करण्यासाठी हे आरोप करण्यात आल्याचा’ दावा खजान सिंह यांनी केला होता.
एका ३० वर्षीय महिला कॉन्स्टेबलनं आरोपींवर बलात्काराचा आणि लैंगिक छळाचा आरोप केला होता. या आरोपांत तथ्य असल्याचं महानिरीक्षक चारू सिन्हा यांच्या अध्यक्षतेखालील समितीला आढळलं. त्यानंतर उप महानिरीक्षक खजान सिंह आणि निरीक्षक सुरजीत सिंह यांच्यावर निलंबनाची कारवाई करण्यात आली.
संबंधित महिला कॉन्स्टेबल २०१० मध्ये सीआरपीएफमध्ये दाखलल झाली होती. कुस्ती टीमसाठी खेळताना अनेक राष्ट्रीय, आंतरराष्ट्रीय टूर्नामेंटमध्ये तिनं पदक पटकावले आहेत. गेल्या वर्षी डिसेंबर महिन्यात दिल्लीच्या बाबा हरिदास पोलिसांत महिलेनं दोन्ही आरोपींवर बलात्काराचे आरोप करत तक्रार दाखल केली होती. आपल्यावर गेल्या तीन वर्षांहून अधिक काळ बलात्कार करण्यात आल्याचा आरोप महिलेनं केला.
आरोपींकडून इतर महिला कॉन्स्टेबलचाही लैंगिक छळ झाल्याचंही या महिला कॉन्स्टेबलचं म्हणणं आहे. प्राथमिक चौकशीत, सुरजीत सिंह आणि खजान सिंह दोन्ही सीआरपीएफ अंतर्गत एक सेक्स स्कँडल चालवत असून त्यांचे अनेक सहकारी असल्याचंही समोर आलं.
चोरून चित्रिकरण करून आक्षेपार्ह फोटो आणि व्हिडिओच्या माध्यमातून महिला कॉन्स्टेबलला ब्लॅकमेल करण्याचा आरोप या दोघांवर करण्यात आला. तसंच २०१४ मध्ये सीआरपीएफ प्रशासनाकडे करण्यात आलेली तक्रार मागे घेण्यासाठी दबाव टाकण्याचाही आरोप करण्यात आलाय.
