नागपूर (कार्यालय प्रतिनिधी) – विवाह नोंदणीसाठी लाच घेणाऱ्या मनपा कर्मचाऱ्याला लाचलुचपत प्रतिबंधक विभागाच्या पथकाने शनिवारी दुपारी अटक केली. रामचंद्र बिंद्रा महतो (वय ४९), असे अटकेतील कर्मचाऱ्याचे नाव आहे. तो महापालिकेच्या मंगळवारी झोनमध्ये चतुर्थ श्रेणी कर्मचारी आहे.
गड्डीगोदाम भागात राहणारा युवक स्विगी डिलेव्हरी बॉय आहे. त्याचे लग्न झाले. त्याला विवाह नोंदणी करावयाची होती. यासाठी तो महापालिकेच्या मंगळवारी झोन कार्यालयात गेला. विवाह नोंदणीचे काम महतो याच्याकडे असल्याचे त्याला कळले. युवक त्याला भेटला असता महतो याने त्याच्याकडे आवश्यक दस्तऐवजासह पाच हजार रुपयांची मागणी केली. पाच हजार रुपये दिल्यानंतरच नोंदणी प्रमाणपत्र मिळेल, असे त्याने सांगितले. युवकाने एवढी रक्कम देण्यास असमर्थता दर्शविली. साडेचार हजार रुपये दिल्याशिवाय नोंदणी करणार नाही व प्रमाणपत्रही देणार नाही, असे महतो त्याला म्हणाला.
युवकाने लाचलुचपत प्रतिबंधक विभागाच्या अधीक्षक रश्मी नांदेडकर यांच्याकडे याबाबत तक्रार केली. नांदेडकर, अतिरिक्त अधीक्षक मिलिंद तोतरे यांच्या मार्गदर्शनाखाली उपअधीक्षक नरेश पार्वे, शिपाई लक्ष्मण परतेती, भागवत वानखेडे, मंगेश कळंबे, राहुल बारई व प्रमोद पिंपळकर यांच्या पथकाने सदरमधील महापालिका रुग्णालयाबाहेर सापळा रचला. महतो याने साडेचार हजार रुपयांची लाच स्वीकारताच एसीबीच्या पथकाने त्याला अटक केली. त्याच्याविरुद्ध सदर पोलिस स्टेशनमध्ये लाच लुचपत प्रतिबंधक कायद्यान्वये गुन्हा दाखल केला.
